【曾智華專欄】你上咗船先啦

家居周圍近年出現N個新樓盤，一個又一個落成，十年之內面對市場風雲變色。十年前，皇帝女，個個豪宅盤搶到飛起，排大長龍再限購，好似買到單位等於執到一噸金。
　　
不過，時移世易，發展下去，個市慢慢變「謝老四」，發展商改變策略，狂「𠱁」買家上車，總之你上咗先啦老友。
　　
當中一招，幾年前已聽到地產代理周圍貼街招——三年白食白住！
　　
老友，口號真係好震撼喎。不過，你估我未戒奶BB咩？白住？好奇之下，唔買都多口問問。
　　
哦⋯⋯原來條「橋」係叫你先付三成首期上車，然後「白住」三年，之後再付埋其他費用。
　　
係咪好吸引呢？因為買一般物業，你畀完三成首期，仲要即供。如今引咗你上車先，再𠱁你：「三年後，可能樓價繼續升，到時沽貨賺錢又得，再按，銀行估價都高啲啦！快啲買啦，好嘅單位極之搶手，轉頭已經冇晒㗎喇！」
　　
聽落的確筍，搞到不少買家心思思，決定「白食白住」三年，懷有到期後升值之望。
　　
有位老友正正受「先住後付」計劃吸引，滿心歡喜三年前上車。結果，你知我知發生咗乜事，間「白住樓」不停貶值外，更因要「為下代」，決定移民英國，點搞？間樓價值冇咗兩成幾，銀行又越估越低，「白住」完後要上會，抬錢每月供十幾二十萬元⋯⋯
　　
結果把心一橫，忍痛撻訂去也，感覺就是成頸血。但資本主義社會，食咗鹹魚要抵渴！
　　
這種「先住後付」的「𠱁」你上車計劃，如今仍然繼續，願者上釣，仍有大量地產商推出，也有不少希望「白住」者接納，三年後如何？各安天命。　
　　
最近又有一個豪宅盤交託經紀猛Sell：「五折，銀行唔做按揭，只收現金！」
　　
咁筍，肯定魔鬼在細節啦！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。