【曾智華專欄】開飯．寶劍．俠士

上周本欄提及的「田雞開餐」現象，本周三又來啦。當晚田泰安騎七隻，我當然金睛火眼𥄫實佢第一場點跑。大家可以重溫片段，田雞入直路後，施展「搶錢」式跑法，百分之一千充滿誠意，騎隻十六倍冷馬「吉吉利高」僅短馬頭輸Q，但P都派四十三元五角，先食頭圍。
　　
如此鬥志，當然是「開飯」信號，必陸續有來。果然當晚騎七隻，五隻有P，過關已發過豬頭炳！尤其第四場隻「木火同明」，田雞與潘頓沿途睇住隻大冷「天足貓」放啊放，佢哋就睇啊睇，肯定隻「貓」W才衝入二三位，二三重彩肥過肥仔水！
　　
當晚另一場要存記，為「軟硬鞭」潘頓騎「佳運發」，熱到兩點四倍，因排一檔兼上場由希威森跑都只輸短頭，幕後唔順，換潘頓。
　　
結果？哈哈，去片！大家欣賞佢點用超級柔性演繹，沿途好似未食飽咁款！
　　
競賽小組當然問話，「一哥潘」當然又有一套馬迷會問「嘩！咁都得？」的解說。照例競賽小組又收貨，認真吹乒乓。
　　
明天開始，級制大賽陸續有來，首先是二級賽「沙田錦標」，跑千六米。
　　
潘頓地位超然，可在最勁的兩馬王中選一匹，結果放棄孭頂磅的「加州星球」而騎「永遠美麗」。其實我睇兩隻明天都不會硬去，因讓磅賽，為乜要搏盡傷元氣？當然先熱身，等更高獎金的一級平磅賽才見真章啦，今次先以P交代算數。
　　
布文騎「加州星球」，有寶劍配俠士之感，騎得好，必定再有下次！
　　
呢場應該又爆冷格。我會以「發財先鋒」及「綫路之星」二重彩複式指定一二位，再拖「加州星球」及「永遠美麗」跑第二。即兩隻馬王最多入Q而不會W！
　　
中唔中？簡單，明天四點十分揭曉！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。