【曾智華專欄】尊貴客戶畀銀行玩殘

邊個係尊貴客戶？我囉！邊間銀行？小弟由孩童時代入錢罌開始，結緣六十多年，更持有佢股票的最大銀行。
　　
點解畀佢玩殘？其實已經玩咗我好多次，相信不少讀者也有相同經驗，執筆前又再玩一鋪，真頂佢唔順。
　　
時光倒流四十年前，有日到銀行辦點事，一位禮貌周周職員游說：「曾先生，你乃敝行長期客戶，為進一步得到更優質服務，不如申請成為『尊貴客戶』啦，只要經常保持有總值一百萬元的存款、債券及股票已可，完全免費！」
　　
「有乜特別呢？」引起我好奇。
　　
「包括專櫃提供更快捷服務，毋須排隊，又可在客廳設計的大堂享受咖啡畫報，一切免費！」佢遞上申請表，令我難以抗拒。終於四十年前成為「尊貴客戶」。
　　
起初真的幾好服務，但隨著時日過去，「尊貴客戶」人數漸多，而銀行搵錢目標不再以基本服務為主，醒目的職員調晒去推銷「食大茶飯」的金融產品，尤其是客戶即買即被斬的基金（我領過嘢，一買，先斬佣金，再斬手續費）。
　　
好嘞，佢點玩我呢？小弟喜歡「打簿仔」，但銀行望推電子化，咁點「趕簿仔客」呢（個人經驗作推測）？就是搞到本簿仔條磁帶成日壞（以前的絕不如此，但約五年前的新簿仔𥔵帶勁差），一壞就要到櫃枱修理，次次排隊，煩死你為止。
　　
呢呢，昨日我本簿仔又壞。攞去九龍最富貴的又一城分行尊貴客戶部，要求職員搞搞。
　　
「麻煩排隊，等叫號碼！」
　　
「小姐，幾十人喎，可否幫手過一過磁帶機啫！」「唔好意思，冇人手！」
　　
就咁，我等咗幾耐？一小時！職員原本只需拉一下磁帶機的服務，卻玩「尊貴客人」，逼呆坐一小時，係乜服務態度？