【曾智華專欄】兩套中途離場電影

今日呢篇稿，刻意等兩套片上咗一個星期才刊出，以免被指「阻住人發達」。
　　
為支持電影業，差不多套套新片，我盡量入場。好的，由頭睇到尾，再極力推薦老友、讀者捧場；唔好的，一如幫襯食肆，出少句聲，反正趕客的店遲早都會執笠，毋須再加把聲也。
　　
電影又如何？好與壞，有時幾個人口味。例如，若是你充滿愛國情懷，自然地覺得「主旋律電影」套套佳作，必須捧場。不過，遇上班西方式教育長大的「番書仔」，可能感覺完全不同。單單睇主旋律電影在香港的平均票房，大家已略知一二，毋須細表。
　　
上周入場睇咗兩套電影，兩套皆中途離場，因唔想再睇落去。
　　
第一套為《紮職2》，有黃宗澤、陳家樂及張繼聰孭晒飛，極度落力，幕幕瞓身搏老命。
　　
點解我頂唔順中段走人？因此片百分百黑幫電影，為力求真實及充滿刺激，一開場已經連場劈友，你劈我，我劈你，血肉橫飛。
　　
係呀，好緊張呀。不過，當你追來追去猛斬，斬足三十分鐘後，老實講，已經有點惡頂。唔知班江湖中人會否好享受，甚至代入劇中人。不過，我呢類普通觀眾真係「斬到滯晒」，最後決定提早拜拜。
　　
此片最令我「眼前一亮」，為現職大狀的中年型男黃錦燊，竟願意客串做黑社會老叔父。究竟佢點解要接拍呢？完全難以理解。
　　
另一套電影為改編自真實個案的《玩謝華爾街行動》。講述一宗罕有散戶打大鱷的搵銀故事。
　　
散戶，從來是大鱷的點心，絕不會偶一為之畀你偷雞，就改變整個生態。
　　
點解我睇睇吓走？因頂唔順一班American Smart Ass的行徑及價值觀，冇乜啱或錯，只是冇興趣睇！