【曾智華專欄】唔認識佢？新嚟？

今日先唔講馬，講人！講邊個？正是TVB現任行政主席許濤及前任董事總經理何定鈞。
　　
未講兩位前，先將時光倒流四十年。其時內地仍非常貧瘠，但香港經濟已開始騰飛。正常現象，大量偷渡客由深圳游水來香港尋找黃金夢。
　　
當時小弟不少警界老友負責拘捕偷渡者，有的就在邊界捉，有的在市區發現可疑的，立即盤問。
　　
「碌Sir，其實偷渡者好易睇得出，單單外形，包括髮型、衣着及神情，一睇就知！進一步查證件及『𢭃』幾句，十次十次中。證件可以是假的，但問香港家傳戶曉的人物，唔知，一定係偷渡嚟！例如《歡樂今宵》邊個係『上海婆』（沈殿霞）？邊個係『大白鯊』（林建明）？又或最犀利本土騎師係邊個（告東尼）？以上三位，只要你係香港人，絕唔會口啞啞！否則拉得！」
　　
點解我諗起警察老友舊話？因近幾個月，全個傳媒皆聽到TVB即將有Major Shake Up（大震動，大換班）。係真唔係真，稍後會知。但大家當然唔會爆，事關重大也。
　　
不過，你唔講啫，總有人高調搶先報道。好難得，記者搵着傳聞中的主角之一、前無記「老頂」何定鈞。小弟識「何老大」幾十年，佢乃謙謙君子、好好先生，從不講花話，竟然直認傳聞，咁即係⋯⋯
　　
點知報道出街後，TVB發新聞稿：「主席許濤先生並不認識何定鈞先生。」
　　
唔係啩？電視界「教父」你都唔識？奇哉！且看事件如何發展落去，非常有趣㗎。
　　
講返今晚跑馬地賽事，三班跑千二米最有研究價值。潘頓騎熱門「閃電」好檔，但我估佢倒灶。反之，三隻劣檔的可以殺低佢，包括九檔「鈁糖武士」、十一檔「炯炯有神」及初出馬十檔的「駿步騰飛」。後三隻買Q、PQ啦！