【曾智華專欄】化妝屋，化妝車

在未有辣椒稅及樓市未瘋癲前，我也有投資物業習慣。一買一賣之下，賺取的利潤相當可觀，短期轉手也有兩、三成水位。
　　
獲利方法，並非有甚麼炒賣秘笈，只是要求相熟地產代理，若家居附近有筍盤就通知聲。
　　
住在何文田、土瓜灣區多年，算是「地膽」，當然知道大概每個單位應值多少。舊區的住客，多數無心將間屋扮靚靚，就算放售，也多是亂作一團，堆滿雜物，間中還有異味，入到去已唔多開胃。
　　
不過，以上一切對我來講，全不重要，重要的是大廈位置、樓層高度、單位坐向⋯⋯只要理想，放少少錢裝修，即可化腐朽為神奇，非常容易提高兩、三成價錢出手！
　　
真的是次次中！買入混亂一片的單位後，先將雜物一件不留，全部清理，牆壁一定要油得光光猛猛，再鋪上雲石地板。
　　
屋中兩處尤其要落多點本錢，正是廚房及浴室，因為女性戶主非常重視，只要女的睇樓客話：「我要！」男的多數遵從。
　　
搞得光光猛猛後，就到淘寶或二手店買些歐洲品味的枱椅、書櫃、燈飾及花瓶等，將全屋擺得靚靚。呀⋯⋯還有，要安裝新冷氣及音響系統。如此，就萬事俱備，可以放售了。
　　
當買家臨門時，一入屋，發覺空氣清爽，裝修新淨，悠揚音樂處處，書架上放滿智者的讀物⋯⋯好感必油然而生，出售，十之八九一擊即中。
　　
這種裝修，可謂「化妝屋」，不一定實用，但你一見就Feel Good，感覺良好。
　　
今日講「化妝屋」，因有專家提點：「碌Sir，近日開始，大量『化妝車』湧出呀，乜Model都有，因早前黑雨浸濕的大量死火車，整返後全部掟晒出市場。若老友想買二手車，必須查清有冇內傷呀 ！」