【曾智華專欄】聞到味嘞

今日標題可有引起你好奇，問：「喂喂，究竟聞到乜味呀？」
　　
我聞到陣陣「招味」，係出招個招呀！邊個出招？政府，終於出招「搞」地價嘞，因已燒埋身。
　　
政府出乜招？睇發展局局長甯漢豪公布今季僅推一地就知，將會逐步用縮減供應來「影響供應」，托住地價，以免變插水，同時希望穩住樓價，否則負資產潮一爆，即會火燒連環船。
　　
睇嚟減少推地只是第一招，若冇效，重招必陸續有來，包括撤去買第二間樓的辣招，更分分鐘曲線重新歡迎內地同胞到港「炒樓」！
　　
當然更可以高調宣布擱置「萬眾噓爆」的「明日大嶼」計劃。
　　
只要一講，肯定個市必似食咗鎮靜劑，因唔使再驚未來日子會有無數地皮湧出，將市推冧！
　　
香港人善忘，另年輕人可能根本唔知，1998年至2003年，政府睇住個樓市冧，嚇到鼻哥窿冇肉。因政府庫房收入，地產乃主要支柱。地產冧，全城財富效應蒸發，市民唔開心，政府冇收入，點搞？於是決定落重藥，由負責的局長孫明揚度狠「橋」，將供應一嘢「鍊」謝，有即時效果，但卻種下日後香港樓市似坐火箭爆升的過猶不及「慘況」。
　　
可能冇人記得孫明揚的「托市辣招」，等我與大家重溫「孫九招」啦。
　　
一、取消拍賣土地，暫停勾地一年；
二、暫停港鐵房屋項目投標一年；
三、公屋興建由需求主導；
四、即時結束居屋計劃（逼買私樓）；
五、為低收入家庭及公屋居民提供免息貸款計劃（大家去買樓啦）；
六、即時結束私人參建居屋及房協資助自置居所計劃（交返畀私人市場搞）；
七、終止出售公屋（要買就私樓）；
八、放寬業主收樓權；
九、取消內部認購限制（大家一齊炒啦）。