【曾智華專欄】大刑侍候何澤堯

周三本欄大字標題《田雞開餐》，結果田雞並冇連場入位，幸而小弟畀的四隻，跑出「英雄豪邁」，W派九十五元五角，若大家每匹買十蚊雞W，也有五十幾蚊盈利，算係咁嘞，總之開開心心有得玩、有得贏！
　　
當晚大新聞，當然為華人騎師一哥何澤堯被競賽小組重罰停十場，指佢策騎「喜至寶」終點前垂手，故大刑侍候。
　　
奇在呢場佢W出喎！好多馬迷摸不著頭腦，點解贏馬都罰呀大佬？
　　
這事引起我極度好奇，遂再三翻睇巡邏影片。小弟的分析，競賽小組其實並不單單針對小何終點衝線前垂手咁簡單，而是針對佢根本由出閘開始，全程冇鬥心及決志去盡搏，因一出閘已漏，然後「柔性」策騎跟跑。其實隻馬沿途自己想衝，雖然何澤堯無拉，但肯定終點前一百米前冇落騎功。大家可翻睇佢最後騎法比對其他騎師，尤其騎「雅典武士」的潘頓！
　　
呢場根本不應平頭，而是「喜至寶」應SureWin。再三觀察，似乎何澤堯「另有諗法」，在多個Close Up鏡頭下（只有競賽董事睇到，普通馬迷冇得睇），自然現形！
　　
重罰絕對合理，但是否判十日就可公開議論。但睇嚟上訴都冇用，因就算你W出，小組都可以咁快咁狠下判決，必定掌握充足理由。
　　
明日何澤堯有不少坐騎，肯定會醒醒定定嘞，因有案底在身，若再畀競賽小組捉正，咁就後果堪虞矣！佢其中一隻馬應熱透，乃第七場的「年少有威」，靚檔兼跑同程未輸過，更又操又試閘，然後嘭嘭聲報名。即想點？即同日同馬房（羅廄）應有過關馬！邊隻？我睇「為您鍾情」及「越駿歡欣」最似樣，兩皆有備而來，擺明配合出招！