【曾智華專欄】各式移民乜都有

本周二下午，特區政府高層必定㷫到彈起！點解？因為呢頭剛剛搞旺個夜繽紛，中秋及國慶勢頭也不錯，大坑舞火龍及十一放煙花更令香港有返多少生氣之時，反高潮，周二下午就炸個華德士人才顧問公司調查報告，指過半專業人士考慮離港，有近一成六更希望盡快走！
　　
究竟個調查有幾準？香港專業圈子中人個個知，但知，乜冇必要大聲講。
　　
呢個調查正似一盆冰水，潑向政府領導層，今勻又要度吓點回應嘞。
　　
小弟呢個年紀的香港人，其實見證多次移民潮，最排山倒海絕非今次，而是1967年大暴動之後，所有富豪走得嘅全部走，唔走的也將財富及家人移離，以保證立於不敗之地。
　　
當時我呢類劏房貧窮戶，只得個睇字，既然完全冇條件走，咁就一心享受港英政府大搞特搞的歌舞昇平囉。有香港節、有卜公碼頭狂歡舞會，再加埋TVB開台，免費娛樂浪接浪，全部屬超級興奮劑。
　　
唔好笑呀，管治一個國家、一個城市，掌權者若不懂令市民大眾開心興奮，好易作反也。
　　
講返今一波的移民，可分幾款。有小孩的年輕中產家庭最熱衷。
　　
另一款乃早早上晒岸的準退休或已退休人士。移民？不少得啖笑，因為一年最少返來三次，搞到初初大鑼大鼓歡送的老友們啼笑皆非，因每三個月就收到：「喂，我又返咗嚟喇，食飯吖！」
　　
另有一款，越嚟越多，乃回流長者移民，開始年老力衰，呆在英美加澳等睇醫生、等入醫院，非常不便，也煩惱。於是靜靜回港租/買個細單位，請個外傭全天候照顧。睇醫生可以私家，可以公家，又快又近，滿滿是安全感也。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。