【曾智華專欄】田雞開餐

幾十年投注賽馬經驗，「捐輸」得多，當然或多或少有點觀察、有點心得。事實部分Pattern，會不時重複又重複出現的。例如不時提及的方程式——高班讓磅馬少＝爆冷。
　　
此外，又有個情況，若一個馬房一日之內大部分馬，畀晒一位騎師策騎，乃出擊信號。
　　
舉例，上周日的蘇偉賢馬房出六隻，有一隻超班馬「新力高升」，擺明實食冇黐牙，但冇乜水位，咁點呢？當然是蘇廄自己部署過關。
　　
一睇，嘩，其他五隻全畀蔡明紹出策，等於必有王者興啦。但我非局內人，鬼知去邊隻咩！一日未開賽，一日都唔知「肥仔賢」搞邊科。
　　
點搞？一於全部十蚊雞WP，睇睇佢開邊瓣可也。結果個Pattern果然中，但勢估唔到，佢搏的兩隻，一隻是近十倍的「爵登」，尚算正路，只半冷。但另一隻簡直看台嘩然，嘩嘩，咁都得？正是六十一倍的「佳尊三」！
　　
呢場嚇到全場呆晒，因W出的「海豚星」老馬七歲，二十九倍，搭落六十一倍的「佳尊三」，條Q派五千元過外！
　　
奇在兩隻馬在閘前一路跌飛，毫無動靜，恍似陪跑！結果開閘後你就知兩位騎師希威森及蔡明紹的鬥志。呢煲大茶飯，只得蘇偉賢知道自己搏盡，就算食其全餐，喂⋯⋯今季都應贏夠，可以收工喇。
　　
講返今晚賽事，小弟直覺為「田雞」開餐！其實觀察佢每個賽日會否郁手玩「連珠爆發」，好易，睇第一、二場有冇搶錢咁款搏甩髀就知。
　　
今晚田泰安出足八場，馬神幫到盡，因有七場抽到六檔或以內，靚晒。另一隻「赤馬雄風」，也只七檔，冇壞。
　　
睇個勢，田雞三隻有機會，包括「英雄豪邁」、「紅逸舍」及「闖一」。
　　
特別留意未跑過快活谷的「錶之雲端」，我嗦到有多少冷味呀！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。