【曾智華專欄】月薪三十幾萬元筍工

放長假，逐一翻閱平日未睇完的舊報章。
　　
睇睇吓，咦過癮，有一份三十幾萬元月薪筍工（包括基本薪酬、各種福利及約滿酬金），正在打鑼搵人（或早已有人選，純走過場？），10月18日截止報名！
　　
好奇之下，膽粗粗自己問吓自己，能否符合資格去馬應徵，都幾好玩！
　　
呢份正是「香港特別行政區平等機會委員會全職執行主席」（職銜水蛇膥咁長）。
　　
好！照吓鏡睇睇掂唔掂：
　　
一、香港特別行政區永久居民（百分之百及格）。
　　
二、具良好教育水平（假假哋香港大學公共行政系碩士，掂）。
　　
三、對推廣平等機會，以及建立一個兼容、沒有壁壘的和諧社會，有強烈承擔（未夠強烈，但肯定有承擔）。
　　
四、有最少十五年公共行政、專業服務或私營機構高層管理的相關經驗（都應該過到骨嘅）。
　　
五、有清晰遠見、持正不阿（應該不比絕大部分現職高官差），具出色的領導才能，擁有成熟的行政及公關技巧（中上咁啦）。
　　
六、在香港公共機構或社會服務方面，具備豐富經驗（又全中噃）。
　　
七、具有出色的語文及溝通技巧，中英文水平優良（做咗四十幾年傳媒、開咪三十年，若冇溝通技巧及語文水平，早早去咗「堆填區」啦）。
　　
呢份工因強調「平等機會」，故完全不提年齡、性別、性傾向、種族、健康狀況……非常之「政治正確」。不過，你知我知，會唔會真係唔考慮應徵者以上的一切呀？玩咩！
　　
例如，若我去馬，一個唔覺意中咗，會真係可以成七十歲，成個老翁咁款出任？觀感上似乎有點唔妥喎！諗落自己玩完「照鏡」，都係唔好多手申請嘞，否則中咗咪死？必定嚇到抑鬱症復發，累街坊呀！