【曾智華專欄】今季騎練可喜現象

香港人怨言多，尤其網上，看留言恍似大家活在萬劫不復的苦海，再沒有明天！
　　
兼且毒舌的Haters多如天上繁星，個個因可以隱身，就有理冇理胡亂發洩。
　　
這個對佢哋自己不好，因成身「毒素」，對讀的人也或多或少受影響，以為世界就快末日。
　　
雖然小弟唔會儍到信政府講話——Hong Kong is Back，但卻絕不認同「香港已死」咁誇張。當然，若你乜都放棄，咁就蛇都死。倒轉，若肯做，香港仍大把工。我從未見過失業率如此的低，升職如此的易⋯⋯再者，終於見到嘞，打工仔若肯認真咬咬牙捱，兩夫婦攜手，應不少「上車盤」揀嘞。
　　
講吓馬圈，今季開波雖然投注額偏低（鬼咩，戲碼咁弱，點刺激投注意欲？），但睇騎練，又覺希望在明天！
　　
例如練馬師頭十位，全部「香港幫」。因韋達也算「土炮一族」！當中以呂健威、沈集成及伍鵬志最為耀眼，後者開倉不久，已能交出亮麗成績，唔簡單！
　　
騎師方面，最可喜是潘頓有對手了，唔再輕易隻手遮天，變無敵是最寂寞。澳洲殿堂騎師布文肯留低，對香港馬圈大有貢獻。
　　
新丁更令人欣喜，鍾易禮這牌仔騎功日趨成熟，毋須再單靠狂放跑法，識得留一留誘敵，再終點前發力反勝，勁！而霍宏聲交馬更準，跑二十六場，有十三場入前四，全港最勁！
　　
明日又有一場級制賽「國慶盃」，頂班跑一千米。首先可飛起上次偷雞成功的「精靈勇士」，仲得？你玩晒咩！另外，一千米專家「好眼光」季初仍未入狀態，放棄。
　　
潘頓的「勝不驕」必成全熱門，但上次佢騎過的「狀元及第」有機成攔路虎！另外「駿馬風采」及「英雄豪傑」也擅一千米，就用四隻複式二重彩啦！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。