【曾智華專欄】蘇菲亞羅蘭要日日拉筋

上世紀六十、七十年代全球年輕人偶像、被譽為「意大利女神」的蘇菲亞羅蘭，剛剛八十九歲生日，豈料傳來噩耗，在家中浴室摔倒，弄至股骨多個部位嚴重骨折。
　　
蘇菲亞的一跌，有似蔡瀾早前一跌，股骨落地，長者骨脆，極易變綜合斷裂（Compound Fracture）。
　　
早前小弟在本欄寫過——唔好跌、唔好跌！得到大量長者老友回應，間接令大家加倍小心，無論外出或在家，將一切動作減慢，可以扶的話，就扶住行。浴室又濕又滑，必須設置多個扶手！外出時，女長者要戒穿高跟鞋，一律改穿波鞋可也。如今的波鞋，不少出自時裝大師的手，設計得有型有款。
　　
除咗小心、小心、小心外，長者更要早早在身體的柔軟度及平衡力兩方面裝備好自己，除減低跌倒機會外，就算不幸一跌，也減少重傷的機會。
　　
人就是人，身體必然隨著時日衰退。其中大家必須持之以恆做，以保護自己的，正是——拉筋！
　　
小弟早年工作高度緊張，除精神系統出事外，筋骨因長時期繃緊，搞出管腕炎及坐骨神經痛，晚上難以入睡，早上下床也有困難，苦不堪言，精神及情緒差極，免疫能力當然下降，繼而百病叢生。
　　
終於得到朋友介紹，找到「拉筋大師」關啟敬醫師，佢笑笑口說：「唔使打針食藥嘅。嗱，跟我指示，日日勤做拉筋啦。持之以恆，自然好返，唔使嚟睇我㗎！」起初有點猶豫，但為「脫苦海」，一於跟足指示做。兩星期下來果有神效，不花一分錢，也不用服藥，好返！
　　
從此，我每年皆請關醫師帶領做「百人拉筋晚會」，籌款捐畀慈善機構。11月4日又搞，名額爆咗，少少哋增加十個位畀本欄讀者，有興趣請找Joey：WhatsApp 6194 6615。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。