【曾智華專欄】好彩換咗代言人

大集團推廣商品，好多時會選擇重金禮聘巨星做代言人。原因簡單，將巨星的形象與名氣，帶到產品之上，令人產生聯想，而迷哥迷姐更會因偶像用乜佢用乜，有代入快感也。
　　
每年有幾個大節，商機龐大，飲食集團「不得有誤」，包括新年賣年糕、端午節賣糭及中秋節賣月餅，因家家戶戶及生意人都會買來送禮自用，加上內地同胞追求高質產品，也會加入搶購，故此，市場潛力大得驚人。
　　
正因屬於飲食集團收入命脈，故一定要早早部署出擊，除不斷改良產品，提高質素，更會預早簽定巨星做代言人，出手絕對不可私私縮縮。
　　
用巨星做代言，好處是借助形象及名氣推廣產品。唔好處是當你鋪天蓋地用巨星谷盡宣傳，買下最昂貴的戶外廣告位，網上、報章及電子傳媒也簽下重錘出擊合約，瞓晒身時……突然出意外！
　　
乜嘢意外？因巨星也是人，同樣會犯上正常人的錯誤，包括婚姻破裂（你睇尊尼特普）、酗酒濫藥、醉駕鬧事……
　　
更甚是犯法被捕，又或與犯罪分子拉上關係。負面消息一旦曝光，形象輕而受損、重而破滅。
　　
所以，大集團請巨星做代言人前，都會制定合約，保護自己，以免損失龐大廣告費、代言費之餘，更連累產品滯銷。
　　
昨日在某會所桑拿房，正正聽見一段對話，乃某飲食集團大老闆與老友閒談。
　　
老闆：「嘩，真真成額汗！好彩早前心血來潮，決定換掉用咗多年的月餅代言人，否則，一褲都係呀！」
　　
老友：「點解要換呢？」
　　
老闆：「如今做代言人明星，必定不能有政治色彩，因企哪邊都死。更重要，千祈咪黐上古靈精怪金融界產品！」

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。