【曾智華專欄】「方程式」又中到應

乜嘢「方程式」？本欄馬迷讀者必知，也應贏到盤滿缽滿，正是小弟再三強調的贏錢方程式——高班讓磅馬少＝爆冷。
　　
今季有三次這種情況，三次皆全爆冷。上周六我又指明三級賽「慶典盃」必爆無疑，因只得六匹馬跑，當中「直線力山」非短途馬，擺明湊興熱身。另外，告東尼出三隻，揸硬莊，佢想點開都得，但肯定必爆！
　　
果然，爆出最冷的「健康愉快」，九倍W，今鋪真係笑甩牙，簡直難以置信！
　　
點解難以置信？因隻馬牌面又高分又勁，兼且羅富全當朝畀馬房「例湯」貼士，用佢行頭，顯示信心十足，咁都竟然變全場最冷，難明！小弟當然以佢做二重彩複式膽啦。一於飛起「直線力山」，再拖四隻，投注八十元，結果派二百六十元，再贏多十蚊雞W，又派九十元！
　　
早前我曾在本欄話畀羅富全「例湯」（馬房貼士）淥親，今次一鋪返晒來啦，哈哈。
　　
當日另一隻馬也與我有關，正是聖若瑟書院一班舊生夾份的「堅又威」。真係福有攸歸，因馬主們許諾，每次贏得的獎金，皆撥出部分行善。結果隻馬出五次，兩W一Q，獎金豐厚，弱勢社群大大受惠也。
　　
不過，今次潘頓擺明跑錯，搞到入直路後要打到隻馬飛起，才贏短頭，耗力甚多。相信有排才能回氣喇。
　　
今晚快活谷跑九場，季初報名馬疏落，馬會竟仍拆九場，相信是為拉長時間，配合政府「夜繽紛」。
　　
今季練馬師，最威者是「威哥」呂健威，次次有馬贏，剛剛又殺三場，龍虎榜上遠遠拋離其他對手。好多人唔明，點解會咁勁？
　　
我都唔明，不過一定要跟！提供WP「水晶酒杯」，從未在快活谷出賽，但靚檔兼操到嘭嘭聲，試閘W出，明刀明槍！