【曾智華專欄】快快勁搞「啤酒節」

香港的「夜繽紛」活動，暫時走勢麻麻，可能要到中秋節當日及長假期才谷得起，因所有家庭皆有個藉口走到戶外，迎月賞月追月也。
　　
其實「夜繽紛」若再來老餅式廟街及大笪地一套，唔係話完全唔得，但只限極度懷舊長者，以及以獵奇眼光參觀的遊客。
　　
千禧年代前後出生的，邊有興趣呀大佬？
　　
咁搞乜呢？上周小弟提議外判馬會搞。
　　
真㗎，馬會每周三在快活谷舉行的Happy Wednesday，乃最佳「夜繽紛」樣辦。有音樂，有勁舞，有啤酒，中外年輕遊客狂歡，六點幾直落狂歡到十點幾。
　　
上周五本報副刊版頭條，也是「夜繽紛」另一示範版本——《慕尼黑啤酒節狂歡嘉年華》。
　　
曾幾何時，香港的啤酒節也令人心花怒放。我參加過幾年，就在海運大廈停車場。飲食攤檔幾乎全由在港的外籍人士包辦，售賣德國鹹豬手、各式香腸、Pizza、即焗麵包、牛扒豬扒，當然配以大大Jar的生啤。
　　
熱鬧氣氛，再加現場的「抵死」樂隊（抵死非其名，而是表演內容抵死），大唱可令人癲狂的經典勁歌外，最令大家笑爆嘴，為玩鹹鹹哋的演出。高潮時，成員穿白色浴袍演奏，裏面真空，搞到現場女性大聲尖叫。
　　
有次我行經後台，發覺班友根本是天體主義者，乜都唔着就行來行去都夠膽死。
　　
德國啤酒節，年年在歐洲各城市舉行，傳承一種地道民族文化及風情，人人開開心心，一入到場地，兩杯啤酒到肚，就會融入興奮氣氛中，沒有種族隔膜矛盾，不分彼此和平相處。
　　
參加過幾次，醉醺醺的快樂人見得多，但從冇見發酒癲罵人或打架的場面。
　　
「夜繽紛」仍有幾個月，政府火速籌辦「啤酒節」未遲呀！