【曾智華專欄】戰爭片可以咁拍

上周四晨早，照例打開最新上畫表，睇睇有乜電影能吸引我第一時間衝去睇長者早場。
　　
《孤注一擲》？內地片，唔知有冇Feel，先不考慮。《威尼斯謀殺案》？非我杯茶，次選。再睇⋯⋯吓，唔係嘛，仲嚟？仲未「磨」夠？講邊套？正是《轟天猛將4》。
　　
呢個系列在2010年開始係威係勢，成班銀幕猛男英雄，為正義執行一項又一項「不可能的任務」，追殺邪惡分子（例菜設計），雖則個個早過咗黃金巔峰，但仍充滿魅力，娛樂性相當豐富。
　　
不過，隨著日子過去，添食拍第二集，又嚟拍第三集，主角們的老態，無論點化妝、點用科技遷就皆日趨明顯，喂！大佬，仲點「轟天」啊？
　　
好啦，到咗今天，史泰龍已七十七歲，但佢明顯整容，打Botox打到個面變晒形，仲要出嚟扮英雄？老老實實，我就有點不忍卒睹嘞，當然拒絕入場。
　　
咁，睇邊套呢？咦⋯⋯呢套啦！
　　
邊套？正是德國金像獎導演瑪姬佩倫最新傑作，真人真事改編的《大偽術師》（《TheForger》）。
　　
電影將大家帶回1942年的納粹德國時期，猶太人全被逼害，故要想辦法逃生。
　　
剛剛有位猶太年輕天才西奧馬，擁有藝術天分，由做軍備到假護照皆非常出色，於是暗暗與地下組織合作，為逃亡的猶太人做假護照，而自己也換來糧食配給券（等於鈔票），可以享樂，甚至追求心儀的女孩。
　　
戰爭片本多殘酷沉鬱緊張冷血，但此片在佩倫炮製下，散發出陣陣浪漫幽默，尤其攝影及配樂，更令人感到舒服溫馨。
　　
《大偽術師》成為柏林影展的「特別展影」推介，絕對實至名歸，乃今個期檔耀眼之作。
　　
德國片，我絕少睇，今次眼前一亮，尤其男女主角，顏值非常高。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。