【曾智華專欄】「天地同欣」終會有日⋯⋯

周三本欄提供的沈廄鎮倉寶「喜蓮勇感」，果然大超班，輕易彈離贏個多馬位，令後面的賽駒食塵。今場若非排十一檔，肯定大熱。結果一個差的檔位令其有接近六倍賠率，超晒！不過，日後再跑快活谷1,650米，賠率必熱到癲！
　　
當晚有兩項觀察，值得存記。
　　
一為方廄隔夜練馬師王只得1.75倍，即馬會操盤手肯定佢會空群出擊而又會得！果然幾乎場場去，贏到開巷，明刀明槍。
　　
另一位田泰安，開跑前騎師王由本來隔夜的7.5倍大幅滑落（唔知邊個咁醒呢？）。果然第一場已搏老命騎「烽煙載喜」，可惜人算不如天算，轉彎入直路被「摯多福」一撞，起碼唔見兩個馬位，結果半馬位落敗，冠軍為布文。
　　
呢場根本應頭二馬對調，所以，若非意外，田泰安才是當晚的騎師王！
　　
田雞慣性，若當日「郁手」，即會場場去盡，故睇佢第一場的鬥志，已可見端倪。
　　
明天開始有級制賽，跑三級，但一睇報名，唉，乜又咁唔畀面呀，小貓三四隻，非常冷落。
　　
呢呢，既然得六隻跑，即又可以再用小弟提供的方程式——高班讓磅馬少＝爆冷。
　　
六匹之中，「直線力山」為專攻大賽長途馬，呢場應純熱身。果如是，出三隻的告東尼，就可以任佢「玩」，開乜都得！
　　
我會點？細細哋用「美麗同享」、「線路之星」、「安遇」及「健康愉快」複式二重彩！必有派彩，多或少純視爆冷與否！嗌下都好！
　　
明天有隻馬，佢凡出我都買十蚊WP，正是「天地同欣」。並非為贏錢，而是打氣。因為，嘻嘻，佢出三次，三次皆幾乎包尾，遠距離大敗！咁都跑，即有如馬拉松最尾選手捱返終點，必定全場起立鼓掌。
　　
當然，買佢也為捧馬主老友陳南祿場！