【曾智華專欄】「頭大冇腦」之人

藝人明星，熒幕上英明神武，運籌帷幄，中外如是。咁，熒幕下又如何？
　　
說穿了，其實佢哋在幕前一切，皆有齊劇本、化妝、美指、燈光、攝影，再加導演塑造，故此投射出來的形象，與其真人冇乜關係。
　　
所以，落妝後冇咗劇本美指導演⋯⋯的協助，立時打回原形變普通人，平平無奇。
　　
不止，基於佢哋有名氣，唔方便四圍去，連返學校讀書或到工聯會上興趣班機會都冇，一日只困在影棚、電視台、排練室，接觸的人物事物少之又少，導致見識也相對地少。
　　
小弟多年所見，不少藝人相當單純天真，甚至無知，極易畀人擺布利用，甚至引來騙棍專門呃佢哋。
　　
最簡單，藝人若當紅，搵錢自然易，現金多，必定手癢，但欠缺投資功力，此時必有眾多「投資顧問」主動獻身，美其名替佢哋搵錢，實質是通過買入賣出，上下其手賺佣，更奸的當然連藝人的老本也會用蠱惑手法轉走。
　　
同時不少行業的「棍」，睇通藝人多想做生意，尤其涉足飲食業，誤以為最易搵錢，於是各類「餐館蛇」就埋明星身，揚言一人一份，自己落水，親力親為打理，明星咁忙，單單坐地分利已可。難得有不少儍藝人會信，結果部分蝕到褲甩不止，更上晒身孭下大筆爛帳。
　　
最近似虛擬貨幣騙案，大家又可見到，很多呢類古靈精怪行業，為建立自己形象及「公信力」，從而吸引水魚入籠被劏，所以，騙棍小財唔出，大財唔入，多會重金聘請巨星賣廣告，做代言人。
　　
不少藝人，甚至經理人，頭腦簡單，見大嚿錢即失去理性，總之有「合理價錢」，就唔知賣乜都托塔應承。結果？分分鐘千年英名一朝喪！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。