【曾智華專欄】走得咁快，必有古怪

報章的經濟及地產版，一般都會「與人為善」，唱好不唱淡，報喜不報憂。
　　
故此，若單憑其「新聞」（其實是放料居多）去判斷真正大形勢，咁就好易摸錯八成。
　　
不過，精明讀者必定會讀到文字背後的真正意思，睇穿後，就可會心微笑一下。
　　
一如街邊不少舖頭辰時卯時都猛話「酬賓大減價」，你真係信佢就儍。近年連「執笠」也如是，經常有舖頭喊「業主逼遷，無奈執笠」，不過「執」足幾年仍健在。
　　
轉轉話題。坊間俗語——阿婆走得快，必定有古怪！簡單易明，七老八十婆婆突然飛快逃跑？肯定大難臨頭！故拼盡最後一滴力也要「逃離險境」。
　　
老人家食鹽多過我哋食米，判斷多數準。故有正常智商者，就算不一齊飛奔，也應不會蠢到逆向而跑啩？
　　
香港地產江湖，最具智慧的老人家正是誠哥，幾十年來不停示範表演——誠哥走得快，個市有古怪！事實證明佢次次抽身離險境最快。其他同業唔係猶豫，就係呆睇，結果鋪鋪市道大調整（冧檔）皆輸唔少。
　　
好嘞，近日長實又頻頻示範表演嘞，大減價，掟完新盤掟車位，一劈就兩三成。今次又如是，其他地產集團多數仍在觀望。終於一個親海駅已吸盡油塘區新盤購買力。不過，後期仍是去唔晒貨，故要出到睇樓送月餅及落訂大回贈招數，意即個市已乾塘，咁其他油塘新盤點出貨呢？諗吓都驚。
　　
香港經濟走勢究竟如何，有好多顯示性指標，大家用Common Sense已能分析即將怎走。
　　
例如港人破產正在月月上升，另外，強制公司清盤申請也如是，看情況兩皆只在「剛起步」，未來日子會是好是壞，唔使誠哥教你都應識睇啦？