【曾智華專欄】夜繽紛快外判馬會

近兩年人人話香港言論自由空間大大收窄，係真唔係真，心照。不過，就算點窄，仍可以對不少事「說三道四」，尤其網上，對公家嘢毒舌如麻，串爆勁多，冷水盆盆照頭淋，所以負責官員AQ低啲都好惡頂。
　　
例如搞到身水身汗的《香港夜繽紛》，上周四已算天公畀足面，晨早倒水咁倒，紅雨警告，到傍晚立即收晒，畀機會你順利開波。
　　
不過，坊間仍多唔賣帳，你一言，我一語，又話隻「白獅」大吉利是，又話活動炒冷飯，了無特色，更弊為記者上周五晚再四圍巡，已發覺不少夜繽紛區打回原形，好難谷得起。
　　
另外，更冇癮是有比較就即刻相形見絀。例如《星島日報》上周六A1，頭條大大字報道《深圳搶攻21猛招吸港客北上/打造消費專區/大派優惠過夜有補貼》。
　　
喂喂，呢段並非廣告，而係新聞！點解老編放佢在頭版，仲雞乸咁大隻字報道？
　　
簡單，市場導向，讀者有興趣也。
　　
點解深圳夜晚旺成咁？問的人若真想知道答案，簡單，自己上去走一轉，親身感受吓就明白，一切絕非符碌偶然。
　　
香港又如何？我只見到一個地方真真正正有《夜繽紛》興奮氣氛，正是周三快活谷馬場的啤酒園及現場演出的舞台前。中外人士笑逐顏開，揸杯啤酒又唱又跳又互「隊」競飲，馬會搞呢個Happy Wednesday，成功到爆！
　　
特區政府唔好再自己嚟喇，官員血液裏根本冇嘉年華DNA，監粗上馬搞，一定四不像。咁啦，成個《夜繽紛》外判馬會，肯定好快有料到！
　　
今晚快活谷又開波！有跑馬、有音樂、有啤酒、有勁舞。小弟提供二班1650米貼士，「喜旺駒」上場熱身開氣，今場起筷，腳拖明星馬「喜蓮勇感」，沈廄鎮倉寶！兩檔位皆差，換較佳賠率！