【曾智華專欄】殘舊眼鏡照偷

小弟凡開投資分享會，例必警告所有參加者，其中有句口頭禪：「金融世界之內盜匪如毛，騙子如麻，全部以合法或非法姿態出現，目標只得一個：賺/呃你的錢！請勿儍到以為呢個世界有乜乜物物投資或金融顧問的存在，目標是真心想替你賺錢！」
　　
其實何止金融領域之內，嚴格講，通街都有賊，問題係幾時下手劏你矣。
　　
這個情況，如今美國（尤其三藩市）、法國、意大利及南非，比比皆是，你身邊朋友凡去過的，總有三幾個中招，一係被偷，一係狼到被撳住搶。
　　
我又如何？自從幾十年前買過一個勞力士（用來獎勵自己升職）之後，開始放棄所有名牌，由頭到腳只用街坊嘢，立即輕鬆晒，因唔見乜，都再冇肉痛之感。
　　
呢呢，前朝又中招喇，個賊都幾豬頭。
　　
話說我天天早上到高山劇場公園晨運，只穿汗衣短褲，不會帶電話。拉筋時，除下帽及眼鏡放在長凳，以免汗水弄濕。前朝又例行如此，先在健身儀器上玩二十分鐘，然後到球場再快步行二十分鐘。基本天天如是，不過，前朝「好彩」，行完之後，取帽及眼鏡時，咦……點解只得頂帽，眼鏡不翼而飛？有冇肉痛？冇，因朝早戴的只是廉價膠框舊眼鏡，隨時掉得，戴到殘晒。而我的近視及散光，點會Fit到個賊仔吖？意即佢偷咗我副爛鬼眼鏡，只有個舊框可用，相信攞去配鏡片都畀職員笑啦：「先生，個框咁殘，掉咗佢啦！三兩百元有個韓國貨。」
　　
兼且若佢真配眼鏡，又再出現公園，喂，我一眼就會認出喎，正豬頭。 若果為避我而從此唔踏足公園，又何必呢？
　　
說來佢冇偷的帽才值錢，因屬香港國際賽事（馬）的絕版紀念帽，真係唔識貨，懵炳！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。