【曾智華專欄】搞活呢樣嗰樣

上一年政府興講「搶」，近月則興講「搞活」，搞活呢樣，搞活嗰樣。即將開波的，正是搞活夜經濟。睇睇網上留言，冷水多過熱水，一盆盆照頭淋。
　　
我又點睇？做好過唔做啦！政府蹺埋手乜都唔搞就死硬，不如多多少少搞下，希望博三樣中一樣，都好過食「白果」。
　　
應如何搞活夜經濟，噴口水者多，落手落腳者少。小弟聽勻咁多意見，只覺得施永青比較近磅：「呢啲嘢，政府唔好插手搞喇，無為而治，政策上方便大家就得啦。商業活動交返畀商業集團度。有市場，有生意，佢哋自然爆出無限創意。相反，若冇市場、冇需求，猛咁打鑼打鼓都只會拍烏蠅，失敗收場。」
　　
其實任何大政策出台前，一定要做市場調查。最弊是為迎合一個「由上而下」的長官意志，就匆匆上馬，齊齊交差。
　　
夜經濟，搞活前，要先清楚點解現在晚上只有「謝經濟」。把好脈，確定病因，然後設計「藥方」，針對「病人」的需要。
　　
香港搞夜經濟，首先唔關兩組人事，包括六十歲以上長者及二十歲以下學生，前者根本冇精力夜蒲，後者翌日要返學，也不應夜蒲。
　　
咁最大市場喺邊？正是二十五歲到五十歲，事業起步或在晉陞一族。佢哋經濟能力有、體能有，也需要多作或公或私的社交活動。
　　
若鎖定客路是這群，就要徹底了解佢哋想要乜（飲、食、娛樂⋯⋯），點先可以令佢哋湧出來蒲。
　　
有咗調查結果，就可作針對性設計夜市策略，包括訂立「晚晚蒲獎勵計劃」。而指定的蒲點，政府要鬆一鬆手，例如音量可以放寬啲，泊車唔阻街就免抄。然後再搞「最受歡迎夜經濟」設計，直選投票，表揚各大商業集團⋯⋯總之，千祈唔好Hea搞！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。