【康子專欄】主席不肯洗廁所

竟要「主席」洗廁所！似是文革時期，紅衛兵的批鬥活動。
　　
現代不時興了。主席搞成咁，純屬自選動作。因為退休之後，決定與愛妻一起移民美國。
　　
移民就要自己洗廁所嗎？當然。一間大屋兩個人，你不洗，難道要老婆洗！
　　
咁主席夫人也有來頭。曾經是跨國企業的行政總裁（CEO），年逾六十仍鬼火咁靚，要才/財有才/財，要貌有貌。縱橫職場幾十年，退下火線，竟淪落到要替你揸鮑魚刷捽馬桶。
　　
既然如此，主席不肯洗廁所，夫人又不肯洗廁所，不幸兩公婆肚屙，弄到浴室臭臭，點算？
　　
這時候，一定要引用拙文《遙遠的呼喚：姐姐，救我！》（9月9日）。
　　
出街後，人氣大盛，各路英雄群起響應，踴躍供料。原來凡是移民海外，早有金句：「三軍未動，姐姐先行。」
　　
如果冇姐姐？一定要慎重考慮。像主席夫婦，身體健康，富裕體面，子女亦在當地成家立室，原是理想的移民家庭。
　　
無奈眾外傭姐姐堅決不肯隨行。當你在香港，做過主席/總裁，被寵慣了：「往日翠擁珠圍，千人敬。」移民美國後：「今日更無一個，可叮嚀。」（唐滌生《帝女花》）
　　
又是被留學時期，美好的青春回憶誤導。當時二十歲出頭，住大學宿舍，自己動手做家務是「樂趣」。
　　
並有整間大學機構作後援，IT/伙食/保安/水電等有靠山，各方面多助力，即使要洗廁所，只覺好玩。
　　
六十歲後？算了吧。上次的波士頓夫婦，捱足半年返歸，今次的主席夫婦更叻，一個月後即回轉香港。看來這篇《姐姐，救我！》文章，可發展成「海外移民系列」。