【曾智華專欄】搏老命Vs.柔功門

馬季第一擊，本欄幸不辱命，話明香港最高分短途馬王「金鑽貴人」必仆，原因寫得好清楚，兼且再次應驗——高班讓磅馬少=爆冷。這個「定律」，大家請存記，因為一年總有三兩次機會出現這情況，少少哋執返多少可也。
　　
睇潘頓騎馬，我再不會激氣，反之估佢今次開「搏老命」或「柔功門」，因佢用硬鞭軟鞭相當隨意，視乎心意想點。
　　
遠的不講，大家想「欣賞」的話，易！立即上馬會網重溫兩場賽事，你就可知「軟硬鞭」陣上表現反差可以何其大，視監場董事隱形，因吹佢唔脹、掹佢唔長也。
　　
第四場，當然是睇佢點「輸」131分馬王「金鑽貴人」。六隻馬跑短途，好明顯一出閘已經知佢想點。先好整以暇，冇搶頭，守住頭馬幾個身位之後的外邊，毫不肉緊，更不積極，就咁，轉入直路已肯定輸咗半。佢有冇大力推騎落鞭，好似以往跑大賽咁搏命？完全冇。堂堂馬王，就咁輸兩個半馬位，死畀你睇，服唔服？
　　
但潘頓轉身，可以話都冇咁快！第九場騎「旺旺神駒」，因擺明當日沈集成玩「大過關」，完全唔輸得，於是呢場大家又再睇到老潘的「搶錢式」跑法。同一人，一日內變兩種級數騎師！
　　
當日最反高潮，「特首盃」特首冇出現，代表都冇。豪雨成災當然是考慮，但既要搞旺個市拼「XYZ」（乜乜物物），就應出席（閃一閃也可）。跑馬乃香港稅收/慈善命脈，豈可不鮮明支持？
　　
今晚跑快活谷，這裏正是「夜經濟」最成功典範，有遊客、啤酒、表演、賽馬，人人歡樂，如此氣氛，才谷得起個市㗎。
　　
今晚提供「加州得力」，上季同程出九次，八次有獎金，六次入前四，準到不得了，個個騎都得，絕對準繩。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。