【黃庭桄專欄】贏錢獨門秘笈

馬季開鑼，我有不少豬朋，早已磨拳擦掌，誓要同馬會死過，這個賽馬季度，點都要贏返一百幾十萬元先。
　　
「我唔大貪㗎！畀我贏一兩次三T，等我買層樓安居樂業就得囉！其實我唔係爛賭，我只係考自己眼光。」女同事A自圓其說。
　　
朋友S在開鑼日，跟幾個馬主入馬場，當然不是為了吃自助餐，主打節目是踏足沙圈，問練馬師索貼士，對騎師打打氣，好讓自己贏大錢，攞個頭彩。
　　
當然要贏一場馬，資料蒐集是不可少，亦不能懶惰。到底哪一個途程有利內檔馬？騎師和馬匹是否零舍合拍，每次合作都必入三甲？練馬師是否碰巧生日，會有賀壽頭馬？還有晨操表現，是否鋒芒畢露超晒班呢？
　　
我有豬朋則最喜歡觀察馬匹在臨入閘前的動態，從而度出心水馬匹。「你睇！呢隻馬頭耷耷，冇厘神氣，根本想話畀你聽，佢好攰，唔想跑！嗰隻馬成日掛住同隻儀仗馬傾偈，又伸個頭去錫，咁鹹濕，點會有心機跑呢？」講到似是而非，邊一句可信呢？
　　
計我話，賭馬始終是發偏財的玩意，不是按正常牌理出牌，否則便不會有爆大冷門的情況出現。
　　
很多年前，我訪問過香港冠軍騎師馬佳善，除了暢談人生感悟，憶述行船跑馬三分險的驚險故事，我當然不放過機會，問他應該如何揀馬，等我贏錢？
　　
「不用刨馬經！信自己的靈感！你覺得邊隻會贏，就買邊隻。」看似答了等於冇答，其實是肺腑之言。
　　
這些年來，我就用這個所謂觸機靈感，反而勝過刨馬經，起碼信自己眼光，輸了也無悔。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。