【曾智華專欄】口福耳福齊齊冇

上周四晚開始，香港出現百年未遇之「上天倒水」，要幾多有幾多，要幾勁有幾勁，倒啊倒，倒到上周五朝仍唔收手。
　　
早前八號甚至十號風球，小弟仍可出外買報紙及到茶記歎早餐，但上周五完全冇符。
　　
點解？因家居大廈電梯槽入水，瓜直。
　　
水災帶來損失，未知，但小弟素來習慣向光明面看。今次淋一鋪勁，如此肯定長期水頭充足，完全唔使再擔心。
　　
上周五最大失望為我班「快樂傳媒老是佛」，因一月一度興奮聚會，本來有兩大主題。
　　
第一，當晚畀我用「特別方法」搵到必須排長龍輪最少半年的「合時小廚」，大廚黃永權早早傳來精心設計菜單：馳名炸蝦醬骨、昆布海草生熟地水牛皮煲豬踭湯、梅子蒸魚雲、豬𦟌筋北菇菜膽、脆皮芝麻雞、上湯焗龍蝦煎腸粉、豬油渣炒芥蘭、黑松露太極炒飯、薑葱撈粗麵。菜式並冇似時下流行做法，作到菜名似天花龍鳳，只踏踏實實。
　　
點解「合時小廚」要輪最少半年？當然冇死錯人啦，你試輪一次，歎番餐咪知囉。
　　
另外，當晚第二大主題為逼供！
　　
逼邊個？正是「香港電視界老祖師」何定鈞是也。因較早前傳聞滿天飛，指TVB將會大地震，掌權人物全面洗牌。
　　
結果無記火速高調否認。但過程中，最令人生疑為有報道指記者曾訪問何定鈞，澄清是否回巢（何老曾為TVB董事總經理），答案是「不置可否」！單從報道看，似乎事有蹺蹊，因若果流料，老何應該一口否認。
　　
個個「老是佛」諗住上周五既然有飯聚，就一於兜口兜面問個明白可也。
　　
點知⋯⋯ 唉，上述一及二，同時畀個「乞人憎」黑雨掃場，結果冇口福又冇耳福，吹脹。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。