【曾智華專欄】高班讓磅馬少=爆冷

時間飛快，正！馬季又開鑼嘞，興奮死！
　　
不過，睇見第一日的報名情況，真真唔多開胃，班練馬師究竟想點啊？一千二百幾隻馬，唞暑兩個月，咁都唔畀面，只懶懶閒入紙，作為新季第一炮，你班友真係製造「反高潮」。
　　
尤其那場「特首盃」，只得六匹馬報名？成何體統？唔該特首阿超哥搵利子厚主席傾傾，咁情況唔搞好過搞，小貓三四隻，你係特首都唔會有興趣入場頒獎啦？不如下屆取消咗佢！
　　
不過， 雖然特首盃如此冷落，但並未減小弟研究興趣，尤其呢場跑九十分以上高班馬。
　　
個人多年觀察兼用真金白銀換回來的親身體驗，有句口號十次中八次，正是：高班、讓磅、馬少＝爆冷！大家有興趣可以翻查紀錄。
　　
今次文家良在如此賽事出隻馬王「金鑽貴人」，實在令人費解。陰謀論者必問：「喂，好等錢使咩？定係擺明搞局呀？」
　　
事實「金鑽貴人」131分，與「金鎗六十」同分，馬王中的馬王，為乜要讓磅跑隻「奀盃」？完全唔合邏輯！
　　
須知每一場賽事，都唔排除有意外情況發生，為乜要在呢種場合冒險？值嗎？
　　
再者，每隻馬都有里程（競賽生命），「金鑽貴人」已五歲，跑過十七場，即里程用咗六六七七，為乜唔留返平磅高獎金大賽出擊？
　　
如今走出嚟跑場「唔三唔四」盃賽，我睇頗有「請君入甕」格局， 隨隨便便跑，當熱身。難怪陰謀大師紛指：「幕後輸馬會贏大錢㗎！」
　　
係真唔係真？明天就揭曉。不過，我當然冇興趣買「金鑽貴人」W，反之買佢仆！
　　
呢場其實得四隻馬跑——「金鑽貴人」、「維港智能」、「駿馬風采」及「順勢而飛」。可四隻買二重彩複式，再加「維港智能」做二重彩複式膽，應有得執！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。