【黃庭桄專欄】贏公仔的啟發

每次到嘉年華會或主題樂園，我都喜歡玩攤位遊戲，一試身手，如果運氣好的話，隨時可以捧住幾隻大公仔，滿載而歸。
　　
「嘩！你睇，佢隻公仔好得意喎！」不少女孩子向身旁的男朋友撒嬌，教我聽得飄飄然，懶得戚的虛榮感由心生起。
　　
無論是射籃球、擲豆袋打甩門牙，或者拋波入呈四十五度角的木桶，我都愛逞強，在觀眾圍觀下示範表演。鬼咩！張張刀冇張利，唯有在小情小趣方面，拿下滿足感。
　　
當捧起籃球，未瞄準之前，我都習慣掃視掛起一排排的大公仔獎品，了解要入兩球會有細公仔，入到四球才可贏大公仔。我的習慣，一定是先定立目標，告訴自己：「我一陣間贏咗，就會揀嗰隻粉紅色大白兔。」滿滿自信，容易無往不利。
　　
鎖定目標獎品後，我才正式讓自己「入局」，瞄實籃球框，單手舉起籃球，左手輕輕傍扶，然後人波合一，想像如何用手指落下旋，心中量度出波的力度和距離。
　　
因為志在必得，目標清晰，那份決心會令自己容易得心應手。這一球原來不夠力，那一球中框彈出，下一球射歪了方向，只要再玩多一兩局，從錯誤中改進，必勝無擬。
　　
多年來，就是這一個性格，戰利品往往兩隻手都拎唔晒呢。
　　
放諸人生，如果找不到奮鬥目標，不知道自己想要甚麼，每天營營役役，不就是白白虛度時光嗎？
　　
告訴自己，我要賺第一桶金，我要讀一個碩士學位，我要儲錢去流浪半年…… 定下目標，努力加油，距離成功之日只會越來越近。