【曾智華專欄】喜見蔡瀾周身火

上周六仍是八號風球，窗邊一團糟，毛巾及報紙索完水後，要全部好好處理，心煩。
　　
但世事就如此，你煩？又可能有從天而降一些人一些事，令你即時開懷！
　　
係乜？正是老友傳來一段「星洲網」片段，見到早前跌斷股頸骨的蔡瀾，神隱多月後，終可以亮相了。但並非在香港，而是在新加坡，為一個自己的慈善書法展開記者會。（點解唔通知香港傳媒？否則肯定更轟動，籌得更多善款！）
　　
坐在輪椅的蔡生，明顯身體非常虛弱，瘦咗最少十公斤。新加坡咁熱，佢仍要着褸、圍頸巾，樣子比前蒼老不少，狀況令人有點擔憂。
　　
不過……不過乜？不過，入場後見到眾多記者出席，尤其老友鍾楚紅專程由香港飛去捧場，立即笑晒，開始上力。
　　
分享環節，蔡生多時冇公開講話，一講就滔滔不絕，內容相當豐富。尤其獨家的是，首次披露為何跌倒咁大鑊？乃因見到八十四歲的太太跌倒，佢撲前相扶，結果變自己重創！
　　
天性豁達的蔡生，面對這種無邊痛苦，只好咬咬牙，以止痛藥度日。
　　
最後到記者發問，就似為蔡生插上一個精力澎湃掣，一問一答，幽默感返晒嚟，上晒身，有火有力，過癮之甚。
　　
尤其問到：「假若黃霑、倪匡如今生勾勾站在你面前（依起棚煙屎牙好開心咁款。我加的），你會有乜想向佢哋講呢？」
　　
此問題一出，昔日狂受歡迎的《今夜不設防》中主角蔡瀾立時上身，諗都唔諗，雙手一揮認真話：「你兩條友，我X你XX呀，走得咁X快，為乜唔等埋我呀……（係咪笑到反肚呢？）」
　　
希望蔡生回港休養足夠後，可以開個現場Talk Show，與觀眾互動，肯定對精神健康有莫大幫助！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。