【曾智華專欄】趕鬼入，趕鬼出

上一輩的人，好多生鬼俗語，形容某些現象，非常過癮到肉。例如：趕鬼入、趕鬼出。
　　
即係乜？即係處事矛盾。例如講食及飲，一方面猛「隊」酒，另一方面同時猛食解酒藥。
　　
又例如明知燒嘢食熱氣兼膽固醇高，但毫不節制狂食，不過猛啪降醇藥及大支大支涼茶係咁灌。
　　
呢個情景套落香港地產政策也可以。1998年金融風暴令樓價插水，完全因為之前的「八萬五」政策，加殺到落2003年的沙士，樓市變成供應遠遠大於需求。
　　
結果死得，狂冧！八千幾蚊呎插落二千六百蚊呎。咁冧法，要急救！於是「煲呔」加「孫公」度出完完全全唔起居屋及暫時唔賣地，落重藥搞到供應乾枯。再來一劑自由行加中國起飛，同胞大量可以見光及不能見光的錢湧入香港炒樓，結果，一炒就火箭升空！
　　
升到甩轆，咁點？又要出招「趕客」囉，這正是樓市辣招出現之因，你應記憶猶新啩？
　　
凡落藥，就算超級高手都絕難精準到一招即中，何況更有不少難以控制客觀因素？
　　
結果，政府除辣招煞住需求外，更大量賣地批地，又係極重手，加上2016年中國經濟仍旺，很少人看到大隱憂。
　　
小弟冇水晶球，但見到個勢，真係唔多妥，於是在周一本報《投資王》財經專欄中，指出——I Smell Something Bad！我講完，樓市繼續升。
　　
終於一次兩次三次再警告，到2020年，簡直肯定樓市會大冧，於是又標題——賣樓？快！買樓？等！
　　
近期香港樓市氣氛越來越差，大量供應不停湧現。超人率先劈價散貨後，仍有萬幾新盤滯住，啟德災區入「重中之重」。何況仍有萬萬聲二手盤在放？
　　
你再問我點睇？平均價好難唔去返一萬元一呎嘞！