【曾智華專欄】大話西遊再西遊

電影創作上當然可以天馬行空，但也不可完全脫離基本邏輯及人性，否則就會變離晒地得啖笑。
　　
離場時，隔籬阿叔總括套戲的評語最到肉：「咁都得？你講鬼晒佢啦！」
　　
日常與人辯論，若對方打橫來，完全唔講基本道理，只想贏，咁我必放棄無意義糾纏，只好拋下一句：「咁呀，你講晒佢啦！」然後撤退，免傷和氣。
　　
我講緊邊套戲呢？正是過去兩個月，在內地大收特收，票房已達36億人仔的《消失的她》。此片已成今年票房季軍（咁都得？）。
　　
事實上，電影拍得相當不錯，男女主角靚仔靚女，攝影師也是高手，多場美景，盡顯功架。
　　
此外，近幾年不少內地製作可能導演「浸過鹹水」，故拍出來的感覺，有一定「國際味道」，不似早年般老套（一睇就知內地片）。尤其能夠適當時候加入歐西名曲襯托畫面，增加非中式的浪漫美感。
　　
不過，以上全皆包裝。一套好電影仍是要講靈魂——劇本！否則就如一個靚女，著到周身名牌而冇內涵，一開口即輸晒。
　　
《消失的她》又如何？開頭極吸引，描述一對夫婦到美麗小島度假，但妻子突然無故失蹤，翌日丈夫起床時，發覺一位完全陌生的女子睡在旁，認係佢太太。追查落去，由護照到身體疤痕皆「珍珠都冇咁真」，但丈夫就百分百肯定，此女子非老婆！
　　
如此開場，的確引人入勝。不過，弊！到中段已開始大話西遊，每五分鐘有一個亂來「創造」，兼且越來越離晒大譜。發展下去，編劇變「神」，喜歡點變就點變。到最後完全無厘頭搞個——哦，咁都得（？）劇情做結局。喂，套片有原著㗎，邊會咁騎呢㗎？

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。