【曾智華專欄】初戀一於睇《釀魂》

近日凡見任何成熟老友，例推介一定要睇《從前的我們》。點解只是成熟人？因劇內的感情及韻味，年輕人難有深刻體驗及共鳴感。
　　
好嘞，若果你初戀，又或第一次約女仔睇電影，我又有好介紹，一於睇《釀魂》啦，保證睇完有意想不到的效果。
　　
約女仔去街，若果真有Feel想發展的，男方一定扮斯文有禮，唔會飛擒大咬，以免留下壞印象。
　　
其實女仔肯單獨應約，已經成功咗一半，若能去到拖手仔階段，就更加冇乜得輸矣。
　　
問題在拖手也不能話拖就拖，必須要有個醞釀過程。例如過馬路，為護花、為安全，輕輕拖一拖，不會尷尬。就咁，若過完馬路女方冇Signal放開，即係……掂咗！
　　
另一種場景為約睇戲。排排坐在漆黑影院中，最易有發展。但睇乜戲極重要！首選當然是年輕美男美女愛情片，最易有代入感也。
　　
次選則是恐怖片。要不停嚇餐死的，令女伴全程好驚，需人保護。呢呢，上周開畫的《釀魂》，就正有這種「功能」嘞。
　　
但咁，今個世代有不少細膽男，毫無大丈夫氣概，若自己驚到瀨尿，要倒轉由女方保護，咁就散梗嘞。
　　
《釀魂》發生在荒島上，幾個年輕人撞入鬼屋，遇上連串詭秘事件及怪異力量。
　　
新進導演岑嘉彥分別在澳洲、上海及美國接受戲劇及導演訓練，也參加過不少荷里活製作，相當有天分，電影技巧純熟，每場戲明顯花上大量心思細度，不似部分港產片般「搻簁」。
　　
戲內姜大衛外，全皆年輕演員，個個落力演出，但演技稚嫩，故當「老薑」大衛一出場，立時全比下去，正常。
　　
其實姜大衛初出道時，一樣木口木面唔識演戲，但日月自會煉出精華。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。