【曾智華專欄】快啲、快啲、快啲睇

傳媒人天性，遇上大眾關注又或有興趣的消息，必有強烈衝動盡快廣傳開去，無論是正面的、負面的、八卦的、正經的、嚴肅的、娛樂的⋯⋯ （因太急傳，故此會不時傳錯，尤其手機時代開始後）。
　　
小弟也有強大欲念（切勿心邪），凡遇上好的事物，無論是景點、食肆、音樂、人物、電影⋯⋯ 皆希望第一時間與人分享。
　　
本欄讀者皆知，我逢周四上午就會去戲院。點解？正正搶先睇剛上畫的電影。
　　
通常一個星期會有三至五部新片上畫，睇邊部？當然先搜搜影評及聽聽口碑。不過，對所有上映前的影評及口碑，讀之應要有一定保留，因十之七八是睇完免費優先場者寫的。
　　
睇免費優先場，間接等於「食咗人家茶禮」，極難再百分百客觀。此乃人情世故的一部分，明白嘅明白嘅！
　　
上星期又有幾部片上，罕有地全皆想睇，咁睇邊部先呢？
　　
一於信晒國際影評人及爛番茄影評網指示，睇韓國片《從前的我們》。此乃新導演宋席琳處女之作，佢一出手已被指「驚為天導」，故此片立即獲邀參加Sundance及柏林兩大影展！如此厚譽，必「冇死錯人」也。
　　
劇情描述青梅竹馬男女同學海星及娜拉，從小已種下情緣，奈何人生路上各自決定不同發展，終於韓美相隔二十四年。第一個十二年在網上通過Skype重遇。之後女的與一位紐約劇作家結了婚，倒也恩愛。
　　
到第二個十二年，海星決定赴美探望娜拉。由相見一刻到依依不捨再分手，這段戲，無論編導演皆有巔峰表現，著著顯出導演及男女主角對人際間感情，有非凡及敏銳的觸覺。
　　
好少再咁講，各位，此片若不滿意，搵我回水都可以啊！