【曾智華專欄】公屋妹向上流

羅淑佩升任房屋局常秘兼任房屋署署長，接受《頭條日報》訪問，即變成頭條新聞，讀之相當有趣，因佢冇乜「老官僚味」！
　　
一般傳統高官一係好鬼惡死，例如昔日的曹廣榮、楊啟彥、曾蔭權、任志剛⋯ ⋯ 因為精英心態爆錶，看下屬（間中上司也如此）經常是「俯視」——你班友識乜吖，當然窒人唔使本。
　　
另一種則是不做不錯，少講少錯，幾大唔表態。逼住要表態，就只講既定立場Line To Take，多句都唔會漏出口，極之滑不留手。
　　
發展到今時今日又如何？你話呢？
　　
小弟覺得比較有趣為三位女高官：一、發展局局長甯漢豪；二、房屋局局長何永賢；三、房屋局常秘羅淑佩。
　　
甯漢豪年輕時冇戴眼鏡，溫文青秀。唔知點解做局長後，成日戴深色膠框眼鏡，「老師化」晒。凡發言，口吻就似向小學生解釋或在𠱁大家，百分之一千冇官味，只將市民當小朋友，絕對少見！
　　
何永賢最擅長笑，你係傳媒或議員，想砌佢，真係好難，因佢一副與人為善形象，你攻擊佢？一定自己輸先。
　　
至於羅淑佩，大情大性格局，面對困難頗有拍住心口就上的氣魄。佢係最佳訪問對象，因夠放，冇官款。例如一開口就形容自己為「屋邨妹」，呢個形象絕對受落。香港起碼有一半人做過「屋邨仔」或「屋邨妹」，故此他日羅署長到屋邨視察時，與居民溝通就多份親切感。
　　
事實上，數百萬香港人皆屋邨長大，也因有基本住屋安全感，才能放心在學業及事業上打拼，慢慢向上流。不過，完成向上流之後，有的自願讓回公屋給需要者，有的則死都霸住。且看羅署長點游說「富戶」願為社會大利益做點事了。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。