【曾智華專欄】真人真事真震撼

不時有老友問：「喂，碌Sir，乜你淨介紹Netflix片㗎，有冇其他呀？ 」
　　
終於有嘞！前晚上Disney+，搜呀搜，搜出一套真人真事綁架強姦案，立即睇！
　　
一睇就無法停，直至出字幕及報道劇中人目前的情況，包括罪犯及受害人等。
　　
片名《Believe Me：The Abduction of Lisa McVey》，應該從未在港上映，故此冇中文名。
　　
案件發生在美國佛羅里達州Tempa市，時為1984年，寄居在無良祖母Diana與男友Morris家的17歲少女Lisa，身世非常不幸，故要依賴祖母，結果被其男友Morris不停性騷擾，但因無能力獨立生活，只好啞忍。
　　
為謀生，每日長時間在餅店工作，直至夜深才踏單車回家。
　　
某晚遇上兇徒Bobby，慘遭綁架，再在車內強姦，然後被蒙眼帶回住所，再多次侵犯。
　　
Lisa是一個非常冷靜的少女，在過程中，不停留下線索。先在車內咬手指，將血滴在椅上。回到Bobby住所，又靜靜將頭髮拔出藏在床褥，並假裝願與Bobby做真正朋友。
　　
原來Bobby是個連環殺手，早已強姦及殺掉九名女性。因其手法乾淨利落，故佛州警局所有幹探長期毫無頭緒，只空著急。
　　
終於Lisa的哀求及「真情」打動Bobby，令佢一刻動情，願意放生Lisa，畀佢離開。
　　
問題是Lisa回家後，完全冇人信佢曾被綁架及強姦。祖母及男友固然唔信，就算到警局正式報案後，成隊探員輪流問話，都只覺佢是離家出走去咗玩，而為免被責罵，作故仔而已。
　　
終於只得一個老差骨Larry相信Lisa際遇，願跟進偵查，並私人出錢做科學鑑證，結果轟天大案才得破。
　　
究竟Lisa及Bobby最終命運如何？片尾交代，不可錯過！