【曾智華專欄】巨星如雲拍出嚿雲

是否有錢就可以拍出好戲？不是！是否巨星如雲就可以拍出好戲？也不是！
　　
剛剛上映的《暗殺風暴》正是最佳例子。製作預算為1,600萬美元（1.25億港元），作為港產片，應是中上投資了吧。
　　
至於演員陣容更是「驚人」！導演邱禮濤可用的，包括：古天樂、張智霖、吳鎮宇、胡杏兒、周秀娜、佘詩曼、呂良偉、任達華、姜皓文、洪天明、蔡瀚億、陸永、羅蘭、李子雄、黃德斌、吳毅將、周家怡、張國強、邵仲衡……全部是有名有姓的出色演員。
　　
結果拍出乜？小弟感覺，一嚿雲！
　　
論製作也算龐大。全片充斥亡命飛車、激烈槍戰、轟天爆炸……最精彩是開場的一幕最驚險追捕。警探張智霖不顧生命安危，飛簷走壁狂追兇手，在城市內跳過N幢大廈頂樓，真係人人睇到目瞪口呆標冷汗。
　　
當然內裏應是結合甚多CG及龍虎武師替身。呢幕要將最大功勞歸畀金馬獎最佳動作指導的黃偉亮，佢正正炮製出此片唯一可觀場面的功臣。冇得唔服，睇睇紀錄，小黃設計動作的電影，套套勁揪，包括《救火英雄》、《湄公河行動》、《紅海行動》、《戰狼II》、《智齒》、《神探大戰》、《明日戰記》……相信今天來說，黃偉亮肯定是中國影壇的最佳動作指導。
　　
不過，很可惜，除咗開場的大追捕外，《暗殺風暴》整體成績可以話得啖笑。
　　
電影頭段本來有紋有路，講一個暗殺高手Darker，不斷發出「死亡通知單」。凡收到者，十之九九會被殘殺。這個Lead In懸疑吸引，能將觀眾情緒一路牽緊。
　　
但……點知，劇情發展落去，越搞越荒謬，簡直似架失控跑車，亂鬼咁衝。到變無厘頭時，就由張智霖用口解釋。我一邊睇，一邊「驚歎」：「嘩吓，乜咁都得？」

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。