獨家丨《造星V》亨仔豪爽認熱戀：佢好錫我 港大女友首訪問唔驚男友多女埋身

本周日，《造星V》嘅最後舞台，三甲Lyman、KC、亨仔聯同一眾參賽者，齊現身九展出席《全民造星V Summer Live 》。着住靚仔禮服的26歲亨仔再次自彈自唱Pre-round的《寂寞先生》，不安感冇晒，高音穩定及穿透力之強，完全做到當日豪言的一句「用歌聲震懾大家」。在現場聽到囝囝及男朋友得到熱烈掌聲及歡呼聲，亨仔父母同女友Yannes開心接受《頭條日報》獨家訪問，曾稱未獲爸爸讚過一句的亨仔留意返，亨父咁樣講，「進步咗，而家OK啦。」而女友亦好戥亨仔開心，對於日後男友會獲萬千女Fans埋身，Yannes甜笑表示:「我唔驚。」成個訪問又甜又Warm，恭喜亨仔。採訪 :廖思慧、杜杜

《全民造星V Summer Live 》中，亨仔再次自彈自唱Pre-round的《寂寞先生》。

 

高音穩定及穿透力之強，完全做到當日豪言的一句「用歌聲震懾大家」。

 

亦有跟希晉及Jason等夾Band。

 

亨仔唱歌感染力真係好強。

 

好似睇緊外國Band，大隻佬彈結他。

 

期待亨仔開個人演唱會，麻煩到時留兩張飛畀我吖。

 

好記得比賽時亨仔話自己彈結他麻麻，最憎人講大話囉。

 

26歲唱得又大隻的亨仔（陳鎮亨），基本上在《造星V》由頭帶到尾，雖然跳舞屬弱項但都努力搖擺身體，肯努力別人一定睇得到，特別是親人。亨仔講過冇自信全因唱歌從未獲讚賞，陳爸爸亦未讚過一句，至打入十強才自信返晒嚟，「好開心大家認同我把聲，原來我唱歌係好聽。」

要數《造星V》最洋蔥畫面，呢幕頭三名冇走雞。

 

亨仔父母狂Loop比賽片段

《Summer Live 》完場，亨仔父母及妹妹在場外的亨仔應援區影相，見證囝囝得獎後首舞台，父母笑住答應訪問，提到正於港大修讀機械工程4年級的亨仔公開話過，想唱歌但不獲爸爸認同，𠵱家心態有冇變到?「𠵱家OK啦，希望佢順利，始終讀緊書，希望佢完成學業先，佢選擇行呢條路，都行得幾好，OK啦。」亨父笑言自己都幾Harsh，「爸爸媽媽都會嚴格嘅，希望佢將來行條路會順利啲，自強不息吖嘛，係咪先?」讚囝囝進步好多好多，目前是頭號Fans的亨父，最愛亨仔在總決賽跟Winka合唱的《手心的薔薇》，「好鍾意，每日都聽，哈哈哈。」

亨妹及亨爸在場外應援區影相留念。

 

亨父讚當晚個個《造星V》囝囝都唱得好好，「唔只亨仔，個個都好似好專業。」記者指亨仔同爸爸好似樣，亨父即說，「佢靚仔好多。」

 

亨父最愛亨仔在總決賽跟Winka合唱的《手心的薔薇》。

 

在亨妹的IG見到亨仔父母無論搭車定出外食飯都機不離手，畫面當然係亨仔的比賽片，搞到妹妹笑兩老「超級誇張，每次睇都好似第一次睇。」甚至詐型，「可否理理你們的女兒?」(笑)問亨仔父母有冇說話想同囝囝講，溫柔的亨媽說，「媽咪會全力支持，放心努力追夢。」而全程Keep住笑容滿面及一直搭住亨媽膊頭的亨父說，「Daddy都支持佢。」

亨仔父母無論搭車定出外食飯都掛住睇片。

 

亨妹詐型，好好笑

 

亨妹笑父母：「超級誇張，每次睇都好似第一次睇。」

 

大學女友鼓勵參加《造星V》
《造星V》三甲日前接受本報訪問，對於亨仔曾上載一張同女生畢業合照到IG，問是否女友?亨仔大方認拍拖，「係我女朋友，拍咗兩年半拖，Hallmate但唔同系，佢好支持我參加《造星V》，話你再唔撳報名，我就幫你撳報名。」拍拖開心事，亨仔唔隱藏，「咩都同佢講，我冇嘢食，佢拎嘢畀我食，好錫我，好支持我入行，Fans都知道，仲知佢係fans club admin。」

亨仔上載同畢業女友合照到IG story，被網民指公開認愛。

 

冇諗到亨仔咁坦白認愛，仲願意透露更多，亨仔性格真心好。

 

亨仔在訪問稱IG一早放同女友嘅合照，拍拖不是秘密。

 

Yannes今年畢業於港大食物營養系，睇佢拎住嘅畢業袍「生啤」，亨仔真有心思。

 

亨仔抱住女友轉圈嘅行為好搞笑。

 

希望男友唔好有咁多挫折
九展場外見到亨仔靚靚女友Yannes，對於當日支持男友參加《造星V》又見到支持者越來越多，Yannes好感動，「一路以嚟覺得佢值得呢個舞台，冇諗過佢參加呢個比賽會有咁大迴響，終於有人欣賞佢，好戥佢開心，希望佢一直順利，唔好受咁多挫折，會一直支持佢。」

問亨嫂最鍾意亨仔邊首比賽歌，「揀唔到，首首都係咁loop，solo嗰啲特別鍾意。」

 

《造星V》首個記招，女友同亨媽現身撐亨仔。

 

女友在台下派心畀亨仔。

 

女友見到亨仔Fans整咗好多應援好感動。

 

因為首見傳媒亨仔未有粉絲應援，所以女友及好友先可以輕易埋身。

 

對於男友喺《Summer Live》表現，女友畀1000分。

 

女友離遠同亨仔揮手，使唔使咁浪漫呀。

 

女友眼中的亨仔。

 

《造星V》開播前舉行記者會，亨仔一家及女友已經去撐場。

 

女友是亨仔Fans Club的早期Admin。

 

Yannes話多咗好多Fans幫手搞Fans Club事務。

 

Yannes稱睇男友Pre-round睇到眼濕濕，總決賽現場睇更加感動，「見到佢喺咁大嘅舞台都揮灑自如。」Yannes又透露亨仔比賽期間當然會有壓力，「佢會係咁問我，唱得係咪唔好聽呀?邊個位好差?其實佢係咪真係得㗎?佢好多呢啲問題。我就同佢講，你得㗎，啲人都話你好聽呀，因為多人同佢講唱得好聽，承受壓力高咗好多。」至於如何為男友減壓?「打吓機傾吓電話已經好減壓。」最後提到亨仔會越來愈越多女Fans埋身，會唔會好擔心?已經見晒家長的Yannes甜甜笑表示，「我唔驚㗎，哈哈，我真係唔驚㗎，我對我哋感情好有信心。」

著短褲嘅亨仔好似最順眼。

 

（左起）亨妹、亨嫂、亨仔及亨媽，等到夜晚11點半終可合照，但亨爸因為要返工所以走了。

 

亨妹好識做，本來企亨仔隔離，影完幾張相即同Yannes調位。

 

亨妹生日，亨仔帶埋女友齊慶祝，生日快樂呀十冰。

 

忙完《Summer Live》，亨仔終於可以暫時唞吓同家人跟妹妹慶生。

 

 

【《造星V》囝囝被圍】：

當晚王鋒父母都有入場撐囝囝，鋒媽仲送咗應援畀記者，好sweet。

 

Lyman本來想同應援影相，但因太夜已拆，佢一現身全場尖叫。

 

唔係排隊買平樓，係排隊影相。

 

長龍之王就係Adams。

 

Tsoul好錫Fans彎晒腰自拍。

 

當晚完場後，Tsoul出咗去場外幾次滿足Fans合照要求。

 

王鋒都有好多Fans圍住。

 

Owen仔Fans層面好廣，有婆婆粉又有妹豬粉。

 

 

 

《星島頭條》新網站有更多精彩內容：http://www.stheadline.com/

 

 

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。