【曾智華專欄】防「傭」之心不可無

香港有幾十萬外傭，主要是菲傭及印傭。咁多人，當然乜品格都有。好的當然有，壞的肯定也不少。尤其從鄉下地方來的，到咗一個「花花世界」，引誘極多，稍欠定力，「奸的同鄉」一定會教壞佢。這個，有三幾十年僱主經驗者，必定經歷過，甚至「交學費」也不會少。
　　
單講小弟，幾十年前初請菲傭，真係一嚿雲咁，唔知佢哋有乜劣質文化，後來當然「開竅」啦。首先，敵不過「貪」。窮鄉僻壤來，入到一個滿是「寶」的家，若主人乜都隨處亂放的話，睇得多就會心動。起初靜靜雞攞一件收埋，若未被發覺，膽就隨之而大，跟著二三四五件逐一偷也。
　　
朋友之中，閉門失竊個案不少，最新一宗，主角激到幾乎暈低。
　　
「碌Sir，唉⋯⋯一日都係亂信人。基於求方便，我iPad個密碼通知咗菲傭，方便佢替我處理日常事務，點知⋯⋯」L姐呻到樹葉都落。
　　
L姐記憶力麻麻，為免自己大懵，故幾乎所有要用密碼的，都用同一組數字。哈，咁就死！佢連夾萬都係嗰組密碼。如此這般，菲傭就趁佢出街時，逐次逐次少少咁偷。起初L姐完全唔覺，直至一次去飲宴，想攞隻鑲好的鑽戒用時，咦，乜冇咗？然後才醒起，近日從銀行提取放夾萬的現金「好快用完」，先至察覺唔妥！
　　
佢點搞？唔講啦，總之幾乎斷氣。
　　
「碌Sir，其實我晨早應該炒咗佢，哎，一日都係自己心軟！結果⋯⋯」
　　
L姐原來早早察覺，菲傭經常晚飯洗完碗，就返房鎖門話瞓覺。原來⋯⋯佢不時從後門竄咗出去，唔知搞乜（當然可能有兼職啦！），直至天光前才靜雞雞返歸。
　　
L姐點知？因終於有位通宵更保安忍唔住，爆出這個「天大秘密」囉。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。