独家丨周国贤反驳被批唱歌唔够气 唔觉自己又瘦又干满意身形觉得潇洒

43岁周国贤（Endy）近年歌影双线发展，开show拍戏又拍剧，在新戏《全世界都有电话》中，最大挑战是大部份时间跟电话做对手戏。对被指身形又瘦又干，近睇块面皮肤质素麻麻的Endy，反而好满意磅数多年来维持63至65kg，觉得好潇洒。对于连登仔经常以其唱歌唔够气作话题，唔多高兴的Endy作出反驳，“佢哋可能睇紧几年前嘅片。”采访：杜杜 发型:Eve Chiu 化妆:Winki Tsang

Endy疫情期间狂接戏又开演唱会，他笑言：“有就做，40几岁再唔做时间有限。”

Endy不认识导演黄浩然，但接到对方电话后即答应演出，“佢叫我演一个由头到尾都系打电话嘅人，总之揸住部电话得㗎嘞，我未试过，好似几有挑战性、几有趣咁㖞！故事大纲系讲3个同学喺25年后兑现承诺，我咁啱又系𠮶个年代嘅人，所以几写实。”

新片中，Endy觉得跟电话做对手戏最难。

跟Rosa陈湛文fd咗

因为电影题材写实，拍摄初期Endy都觉得几轻松，“唔使特登去chok，做返平时自己踢拖落街，导演又冇乜特别要求，冇咗某种压力，好率直咁做返自己就得。”但斋攞住电话做戏，演落才觉得难，“我要谂埋电话里面对方谂紧乜，个脑要分开两边。”特别有场戏在渡轮上拍，因有乘客要低调拍摄，未能揾人帮手讲电话中的对白，令他谂到头爆，“我用惯右脑，比较图像化，突然间要用好多左脑，好有挑战性，加上我随感觉演戏，未必每个take会做返一样嘢，哈哈！”

Endy的角色是导演黄浩然的写照，连家中天台景都由导演借出。

对于首跟韦罗莎（Rosa）和陈湛文（Peter）合作，Endy睇过好多Rosa的舞台剧，“一路都好想合作，今次终于有机会！当然有睇过Peter演《三夫》啦！我亦都有跟陈果导演合作过，所以我哋有好多话题。”他形容跟两人既陌生又熟识，“虽然我唔喺APA（演艺学院）大，但我哋有好多common friend，我又演过几次舞台剧。”三人唯一一场同场戏，就是讲中学同学饭聚，拍摄过程令Endy好难忘，“虽然我哋现实唔识，但讲返𠮶个年代嘅成长经历，打开晒话题就极速变friend，好似识咗好耐。𠮶场戏我哋要扮醉，虽然冇饮酒，唔知系咪有啲muscle memory，大家好hyper，哈哈！最有趣拍到去感触位，感觉好真实，唔系演出嚟。”

Endy跟韦罗莎和陈湛文同样40岁出头又已为人父母，所以话题特别多。

经常唔见电话银包

Endy多年前曾代言手机，近年为方便创作亦机不离手，“好多音乐嘅idea都记录喺电话，一谂到就录起，好多最原始嘅demo都系用电话做，有时拍埋片，因为年纪大，弹完之后会唔记得点弹返，哈哈！连填词都会，真系太耐冇用笔写字，有啲字真系唔记得点写。”虽然机不离手，但Endy经常忘记带电话或唔见电话，“但我算几幸运小宝宝，通常有人执到畀返我，两、三年前搭车唔见银包，都揾得返。”曾薄酬报答好心人的他，却未被发现是艺人，“通常比较年轻或年长，都唔知我系边个，哈哈！”

Endy跟周家怡拍完剧集《无人之境》，因角色情绪起伏大，拍得特别攰。

刚完成拍摄ViuTV新剧《无人之境》，Endy受访状态有点憔悴，其实近年他太干又太瘦身形令fans好担心，但当事人反觉得自己好肥，“我一攰就好肿，钟意干啲瘦啲，轻啲个人郁得快啲，唔想咁笨重，同埋我一肥就会冇咗个下巴，肚腩又凸出嚟。”他又称多年来磅数上落不大，“除咗拍《一秒拳王》上过10几kg外，咁多年都系维持63至65kg，可能旧年茹素一年干身啲，今年会好啲。”他强调没有刻意keep，保持身形跟饮食习惯有关，“我唔系好食淀粉质，面包、粥、粉、面、饭都冇乜兴趣，连pizza都少食，但系大家放心，我系钟意食嘢，系边炉之鬼嚟，但好少食红肉，钟意食海鲜同蔬果。”

拍《一秒拳王》时，是Endy体重的最高峰。

Endy强调钟意食嘢，早前便约了黄秋生、梁祖尧和徐天佑饭局。

除了身形获fans关注，Endy唱live状态亦是连登仔长期讨论topic，例如话佢炼住把声嚟唱或者唔够气，他就完全唔认同，“可能佢睇紧几年前嘅片，未睇新𠮶啲，我又唔觉有呢个问题。”Endy坦言有留意网上留言，第一次听被指唱歌唔够气。问到近期最深刻留言？他说：“冇特别㖞，都系正常𠮶啲。”

Endy去年在红馆举行《周国贤THE END演唱会2022》，大骚钢条身形。

对被批评唱歌唔够气，Endy称网民睇旧live片段。

Endy去年开show时，自爆已跟韩籍太太李美英离婚。

《星岛头条》新网站有更多精彩内容：http://www.stheadline.com/