【曾智華專欄】我話唔得就唔得

香港過去二十多年來，出現不少「大白象」級大型建設，全部蝕到香港人眼坦坦，兼且運作上又一鑊泡。其中佼佼者，當然是啟德郵輪碼頭！
　　
十多年前碼頭開始興建，小弟見到最高高官的決定，覺得非常唔妥，早在電台及報章「大聲疾呼」——喂，咁搞一定唔掂喎，好大手尾㗎！
　　
講乜？因作為長年公務員，我絕對理解公務員心態，包括：一、只按章則做事；二、唔好搞乜乜Think Out OfThe Box，最安全因循，不做不錯，多做多錯；三、冇興趣牟利，因搵錢自己冇份之餘，一掂錢就易被指貪污；四、盡量與商界保持距離，以免被屈「官商勾結」，又或明益某某商業集團。基於上述四項，故此凡要求公務員「經營」與商業有關的運作，必會搞成一鑊泡。
　　
最典型例子，早年所有公共屋邨商場歸房屋署管，結果變成點？資深市民必記憶猶新——烏燈黑火，溶爛破落，衞生奇差，管理混帳，保安員愛理不理，甚至開工蛇咗去。
　　
點解？正因冇動力去改善也。結果政府支出大大而收益細細，遂把心一橫，全部打包上市甩掉！
　　
講返郵輪碼頭，若由商業集團營運，肯定未開張已先搞掂周邊交通配套，方便客人臨門。做旺個場後，財源自然滾滾，碼頭變受歡迎旅遊點，日日搞娛樂演出、舉辦展覽會及嘉年華等。
　　
商業集團一切以盈利掛帥，CEO交唔到數，會被踢屁股再炒魷，反之，大把花紅分！
　　
如今由公務員管理？冇生意咪冇生意囉，十年前如此，十年後也如此，你吹乒乓乎？
　　
究竟邊個決定啟德碼頭唔外判畀商營集團呢？正是當年最大權嗰位。有權真過癮，力排眾議：「我話唔得就唔得！」