【曾智華專欄】陳啟宗一矢中的

做傳媒最過癮為好似有張「認識名人通行證」，就算幾低級，小小記者或主持，只要有需要，也可直接打電話約訪問（當然通過秘書），當對方衡量過有需要或有好處時，就會見你。

小弟早年專攻訪問名人，無論官、商、政界，以至學術界、專業界，全部猛人皆曾臨直播室，畀我「盤問」（當年大鳴大放，可以用壓逼語氣提問）。

於是近距離見識到全港頂尖人物的性格及心態。事實，無論官、商、政或專業界，尤其醫生，勁的通常都「精英感」甚濃，信心十足兼崖岸自高。不少用市井術語形容，就是——串串貢，真係串人、窒人唔使本。

有的笑笑口窒，例如何鴻燊；有的明刀明槍窒，例如曾蔭權及胡應湘。
　　
商界另有一位，雖然細細粒，但擺明「巨人」心態，講乜都信心爆棚，正是恒隆集團主席陳啟宗。因佢太有料，經歷多，國際視野勁，全球關係縱橫（亞洲協會香港分會主席），加上大紫荊勳賢，故滿滿傲氣比天高的架勢。
　　
係咪好惡頂？可能係。但我則覺得聽佢講嘢，雖串串貢，但句句到肉，絕不兜彎抹角。
　　
呢呢，本周二佢又「表演」嘞，在「2023博鰲房地產論壇」演講，非常精彩又精準，一矢中的。
　　
老陳絕對可以代表香港一眾本土地產商，勁吐多年來鬱結的「真心話」。
　　
係乜呢？正是要教訓班過去二十年踩入香港的內地暴發地產商，佢哋個個「發夢」，以為在香港搞地產，越掟得錢多越威，兼且儍下儍下覺得地產只會似火箭升空，絕不會回落。
　　
陳啟宗一篤即中：「沒有經歷過兩三個大周期及大起大落的發展商，是不可靠的地產商！」講緊邊班人？大家心照啦，毋須畫出腸啦吓嘛。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。