【曾智華專欄】親海駅震撼連鎖反應

李嘉誠係乜人？神級人！當然，佢投資一百次，仍會有幾次失誤。不過，紀錄證明，誠哥彈離所有人甚遠，包括幾大地產商！
　　
佢睇市之準、出手之快，絕對令人望塵莫及，故才能賺最多、蝕最少，長期坐硬香港首富位置，冇乜邊個能埋身。
　　
尤其摸透香港地產及經濟大趨勢，故經常可以摸頂出貨。近年放售中環中心及半山豪宅波老道兩役，已足以令人歎為觀止！不過，接佢貨的「精明投資者」則慘矣，個氹不知幾時才可填得返。
　　
上周李嘉誠又雷霆出手，油塘靚盤，一劈就兩成，低過二手樓價出貨。
　　
這招隱隱見到1998年故技，火速將翠盈半島一Q清袋。當年香港地產市道遇上金融海嘯，由平均價七千幾元一呎滑落到六千多元。當所有地產商都在慢慢出貨時，誠哥當機立斷，肯定大冧市即將來臨，一出手就劈到四千幾元一呎，立即將所有購買力索清光，搞到其他大孖沙眼光光。
　　
事後才知幾犀利，樓市果然一沉不起，跌啊跌，跌到2003年沙士期平均2,600元一呎才摸底。
　　
如今油塘附近大量啟德及觀塘新盤，仍在企硬1.8萬元至2萬元一呎。二手樓也在拉鋸，冇乜成交，因賣家仍有「良好願望」，故在等大巿調整。
　　
好啦，你哋唔識睇，等超人教你睇啦。佢咁嘅價錢出手，等於覺得現貨只值1.4萬元一呎。呢個價，若又畀佢搶先一Q清袋，咁其他新盤及二手盤就有排捱喇，因購買力再次清倉也。
　　
反之，若1.4萬元仍未能全部清貨，咁誠哥必定減完再減，總之要貨如輪轉！
　　
親海駅今次自己鋤價，帶來的連鎖性影響，將會非常之大。發展如何，好睇過睇戲！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。