【曾智華專欄】街外錢，大家搵

你可知我每日花幾錢買《星島日報》？報面印10元，而我付的是7元。
　　
點解？正因朝早在土瓜灣靠背壟道便利店買，減1元。再者，嘻嘻，唔知有幾多人識，網上有「星島日報零售版購報優惠卡」，一嘟再減2元！
　　
卡唔使錢，人人可下載！但唔再教你喇，自己搵啦，做人一定要戒「飯來張口」懶惰習慣㗎！不過，既然街外錢，我就爆畀你知啫，慳得就慳嘛。
　　
講到街外錢，上周本欄大字標題：《跟傑華海外賽提供》。
　　
究竟你有冇睇，又有冇跟呢？若有，已經發咗個小財喎。因見報之後，若似小弟般，每場買10元複式二重彩，咁上周四及周日兩天的英國、法國賽馬，就有2,194元利潤啦！
　　
十個馬評人，十個喜歡認叻！故此，希望隻隻畀，隻隻中（邊有可能呀？）。中的，理所當然大鑼大鼓，拍枱拍櫈；衰咗，當冇講過，冇事發生（以上請勿對號入座，我講自己咋）。
　　
不過，也有成日中又從不提一聲的，例如在本報提供海外貼士的傑華。
　　
海外賽事，老老實實嘞，十個馬評人，九個識碌竹咩，包括小弟，扮都嘥氣。我曾用「博覽群家」方法，長期統計各大報章及網頁提供的貼士，發覺傑華水準非常穩定。不用講太遠，大家翻查最近四次英國及法國海外賽，已知佢幾犀利，次次中兩場至幾場，有的中埋三重彩。
　　
我每場跟買10元複式二重彩，就咁過去三日贏近3,000元！例如上周四，第一場已中，派1,204元，第四場又中。
　　
上周日同樣厲害，第四場出冷，派1,567元，嚇死，三重彩若有買，又中，派14,077元！點解冇人識的海外賽，佢識？一嚿雲！