【曾智華專欄】又一個中招

有老友批評小弟成個長氣佬咁，某啲嘢講完一次又一次，煩唔煩啲呀？
　　
唔煩唔煩，幫到人就唔煩！例如我最近變成「當紅騙子」，突然網上湧出N咁多個用真相的網頁，話開免費投資班，教人發達。
　　
本來我真係怕煩，費事理佢。點知出吓多啲，出吓又多啲，咁就煩都要嘞，日日在社交平台澄清、踢爆、猛勸人咪上當。
　　
講咗上千次，仍有人留言：「碌Sir，呢個係咪你呀？若不是，快啲澄清啊，報警啦！」
　　
報警？成個星期前已做咗，落晒口供，警方科網安全組專人跟進，非常之認真處理。
　　
另外，我當然不厭其煩繼續澄清啦。
　　
勸人，從來不是小弟杯茶。
　　
不過，若果見到你踩氹，又問到我，當然照正答啦！
　　
剛剛又有財經記者來電問：「近來經濟咁差，應該投資乜呢？有咩生意好做呢？」
　　
「第一，經濟差，去投資？請問你乜嘢邏輯？你可知投資根本不等於賺錢，反之，十個投資，無論係乜，九個蝕本，尤其你唔識⋯⋯撼個頭埋去學人做生意，唔畀人呃至奇，肯定蝕到雞毛鴨血。尤其是藝人及醫生，在自己行業搵錢易，以為其他行業都係咁，當然畀啲『棍』及『蛇』睇中，游說你搞生意，再從中賺你錢啦！」
　　
「係喎，剛剛ERROR隊長肥仔投資的高級日式餐廳，半年就執笠，蝕咗唔少錢喎！」
　　
「係囉，我講咗冇一百都有幾十次，話明藝人投資餐廳，十之九九必定血本無歸。簡單，你又忙又唔識業內的蠱惑招，交託畀人搞，當然大量『棍』及『蛇』埋你身，盡快吸晒你啲血啦。你以為做明星會好多粉絲幫襯，太太太天真喇。粉絲也是精明消費者，你啲嘢唔得，點會嚟第二次呀？肥仔雖然執得快，但唔使身家輸光晒！」

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。