【曾智華專欄】寫好佢Vs.寫死佢

凡做過政府部門管理層者，見到上周公務員事務局的一項公布，相信必會想起上世紀80年代譚詠麟名曲《遲來的春天》，因實在等得太久太久了。
　　
絕非講笑，任何部門的中上層皆知，在政府之內，想「炒」一個公務員難過登天！（有不少話：「炒自己好過！」）
　　
公務員只要過咗試用期，就恍如有個金剛罩。以後無論蛇王吞卜、怠工抗命、人緣狂差、詐病蠱惑⋯⋯任何在私人機構可以即炒的過失，全不能應用到公務員身上，除非犯下刑法。
　　
人有好多種，少數正正滿身陰濕計謀細胞，當知道過咗試用期即冇人可以郁佢時，會立刻「魔鬼員工」上身，懶得就懶，蛇得就蛇，因明知上司吹佢唔脹。
　　
乜唔係每年有考勤報告嘅咩？係！不過，考勤報告有得抗議。只要一個員工認為上司對佢不公，可以向獨立委員會上訴。
　　
如此，上司立即煩到抽筋，因最少要寫幾十個Report，證明自己冇徇私、冇針對，完全是對方未能履行基本員工責任。要點搞？要長期詳盡記錄懶散員工有何犯錯，曾經點樣幫佢改善，真係人都癲。管理人自己已孭N咁多責任，若旗下有一個「玩嘢公務員」，真真頭暈身㷫。若多過一個，簡直想撼頭埋牆死咗佢。
　　
點搞？有計！人老精，鬼老靈，既然踢唔走啲「玩嘢」者，咁糧又唔係自己出，一於倒轉玩，在人事報告中寫到佢出色到天上有、地下無，理應立即升職，調到其他組別及部門。
　　
唔好呻荒謬，亦唔好問係咪搞笑。總之，有三十幾年資歷的公務員，無不親身目睹這種戇居情況。冇人想咁，但制度促成咁！
　　
簡化踢走劣質公務員程序，真的是「遲來的春天」。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。