【曾智華專欄】跟傑華海外賽提供

暑假開始，馬迷齊齊服用「美沙酮」，欣賞海外直播賽事，頂住「捐錢癮」。總之有得「捐」就開心，呢種快樂感覺，向非馬迷講，絕對嘥氣！
　　
睇咗幾日海外賽事，級數分別非常明顯。南非，渣到飛起，也可以「假到飛起」。監管水平明顯不足，故此騎師隨時可以出閘大漏、轉彎波勾，離晒大譜，完全唔似職業賽事。此外，跑道設計及狀態甚差，若出現非正常賽果，蠱惑騎師可以有好多解畫空間也。這般水平賽事，難怪不少南非冠軍來到香港，只可以變二流貨色。例如希威森，初來時孭住個冠軍榮譽，但經常陣上只跑到一嚿雲咁款。
　　
另外，新加坡也如是，好過南非少少，但睇慣香港水準，一嘢已比下去，難怪新加坡政府決定唔玩，也冇乜雷霆反對聲音。
　　
上月底開始播英國賽事，真真不怕不識貨，最怕貨比貨。有目共睹，全球最頂級卡士騎師盡在英國，班精英騎功之高，香港除咗潘頓，其他一碰埋去，又係低咗一班，冇得拗。
　　
投資海外賽事，就算資深如小弟，也要承認——識鬼咩！兼且資料又不足夠，要投注都只能似「瞎子擲飛鏢」，亂嚟一通。
　　
但唔買又手痕，點搞？
　　
有喇，介紹大家跟本報馬經版的傑華啦，佢凡賽日就有海外貼士提供，遠的唔知，單單8月1日及2日的，就相當有水準。
　　
小弟兩日皆跟足佢每場提供的三或四隻，二重彩複式穿勻，結果第一日投注960元，中三場（勝在有得嗌呀），兩熱一冷，共派875元。
　　
8月2日跑七場，投注780元，派1,373元，中一冷一熱二重彩！兩日加埋，竟有超過500元利潤！有得玩，有得嗌，更有得贏。
　　
你也可考慮次次跟「福星」傑華買㗎！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。