【黃庭桄專欄】中年危機

人到中年，行走江湖，點都會身懷一兩種——不是絕技喎！是惱人的病患。
　　
幾個麻甩佬飯聚，當準備點菜時，問及大家有甚麼不吃的食物時，便是自爆病歷的時候。
　　
「我早排驗身，膽固醇超標好多啊，醫生話一定要食藥，我以為單靠改善飲食習慣就搞得掂！唉！一食就要長期食藥，真係手尾長。」豬排A苦笑道，「所以我要戒海鮮，仲有椒鹽魷魚都唔食得，全部都係膽固醇嘅元兇。」
　　
狗友B也一起加入呻到樹葉都落的行列，「你淨係得膽固醇有事，咪好囉！我有齊三高啊！3T又唔見我中。」
　　
豬友C一臉尷尬低聲說，男人到了中年，是有前列腺增生的風險，「我晚晚半夜三點幾，就自動會起身屙尿，之後就瞓唔返啦！搞到成日都唔夠精神，同事仲笑我有熊貓眼，問我係咪夜晚去咗做賊。」
　　
「好心你臨瞓前咪飲咁多水啦！」我建議。他解釋，即使少飲水，半夜依然會扎醒，於事無補，實乃男人之苦。
　　
一班麻甩佬，這個有痛風，那個小腸有瘜肉，他已有青光眼和老花，某某的頸生骨刺，椎間盤又突出，豬朋驗出有脂肪肝，狗友剛用了幾萬元植牙……
　　
人的身軀，不外乎是一副臭皮囊，年輕時盡情揮霍，管它呢！
　　
甚麼東西都照掃入口，不理有沒有營養？會不會傷身？只要開心，只要好味，便大吃大喝，不理後果。
　　
歲月，原來一直為你在計數，血管、筋骨和內臟，都在累積傷患和毛病，到時到候，便要你償還，冇得抵賴。祝身體健康。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。