【曾智華專欄】火力過猛，劇情過弱

期待已久，三大巨星古天樂、郭富城、劉青雲擔演的《掃毒3．人在天涯》終於上映。一如預期，郭富城、古天樂等三人瞓晒身，交足貨。
　　
雖然咁，此片又是否精彩可觀的電影？
　　
老老實實，若閣下只要求打到飛起、飛機大炮、撞車爆破等感官刺激的話，應有大滿足。
　　
不過，小弟近年對不少系列電影，包括《狂野時速》、《殺神》，甚或仍在上畫的《職業特工隊》，真的開始對曾經目瞪口呆的驚險場面先而麻木，後而厭倦，搞到不少次戲未完已「投降」走人，拜拜去也。
　　
今次《掃毒3》也有這方面的感覺。開場十分鐘，真真正到飛起，氣氛令觀眾腎上腺素飆升。事實邱禮濤從來是處理高壓場面的高手，當然動作指導李忠志亦應記一功，電影開場確有荷里活A級片的水平。
　　
不過，套片長達兩小時，絕不能靠十分鐘去孭飛，一定要有很多可觀點子湊拼埋一齊，搞好起承轉合，劇情環環相扣，才能吸住觀眾追看到尾的呀！
　　
邱禮濤作品甚多，不少老闆喜歡用佢，因實在是一位快靚正商業導演，每部戲都交出一定水準，未必大賣，但很少蝕本。
　　
今次《掃毒3》老邱自任編劇，水準普通，兼且可能放太多心思，處理十分鐘就出現一次的飛機大炮打到開花場面，故再沒有足夠時間處理人與人之間的感情戲及主角間的內心戲，只好間中「搻簁」（馬馬虎虎，音「揦西」）帶過，著實美中不足。
　　
不過，又係那句，大佬，你花幾十蚊睇咁嘅製作，仲有乜好怨呀？超值喇！
　　
係係係。咁啦，介紹大家欣賞女主角楊采鈺啦，出現次數不多，但這位北京電影學院出身的泰籍華人演員，有難得一見的氣質！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。