【曾智華專欄】根本唔夠馬分

1999年在香港開倉的南非練馬師苗禮德，最近兩季成績大跌，剛季更加包尾，只得九場頭馬，令馬迷大惑不解。因此君在過去二十四個馬季，曾兩度奪得難度極高的打吡大賽冠軍（「勝利名駒」及「雄心威龍」），而「雄心威龍」更兩度成為香港馬王，老苗練馬功力毋庸置疑。點解會突然「搞成咁」，至今仍是一個難解的疑團。
　　
事實馬會並冇炒佢，今季其實照樣發牌，而圈內皆知，老苗本想練下去，希望證明自己的價值。不過⋯⋯ 眾所周知，馬圈乃最講現實的英雄地。你練到包尾，又收咁貴，當然被揶揄「燒鵝價錢練出蔗渣味道」啦。如此環境，將心比己，你是馬主，會否仍每月付出高昂費用畀馬佢練而極大可能得個桔？當然個個心諗：「點解我隻馬唔畀新開倉的過江龍廖康銘或本地薑巫偉傑試試呢？兩人新嚟新豬肉，為交出成績，必定搏老命也。」
　　
其實苗禮德並非想拜拜，而係形勢所逼，想練而冇馬練，仲有得唔走？
　　
香港現役馬約千一匹，每日皆可能有三、四匹馬因這樣那樣情況退役，即長期只得一千匹鬆啲，而要分給二十二個馬房。
　　
馬主心態，當然信名牌，西瓜靠大邊！於是乎頭十個倉幾乎個個爆棚，即已壟斷接近七百匹現役馬。咁即係點？簡單數字，餘下十二個倉，就只得三百幾匹馬分，平均每廄三十匹左右。
　　
在此情況下，就算苗禮德勉強留低，你話慘況會點？分分鐘只得二十匹以下，真係「跑鬼跑馬」咩，肯定又再包尾啦！
　　
順帶一提，來季馬主更難做，整體經濟不佳情況下，通脹仍不停升，馬會當然「糖又加，鹽又加」，想學人做馬主？唔該照鏡諗清楚！